Memleket qaıratkeri, qazaq til bilimi men ádebıettaný ǵylymdarynyń negizin salýshy ǵalym, ulttyq jazýdyń reformatory, aǵartýshy Ahmet Baıtursynuly esimin jastar arasynda keńinen nasıhattaý maqsatynda İ Respýblıkalyq qazaq tili men ádebıeti páninen oqýshylar olımpıadasy bastaldy dep habarlaıdy Qamshy aqparattyq agenttigi. Olımpıada qaztest.kz saıtynda ótkiziledi.
Olımpıadany QR Tuńǵysh Prezıdenti – Elbasy qorynyń «Eń úzdik bilim saıty» atalymynyń jeńimpazy Martebe.kz bilim portalymen Qaztest.kz ınternet saıty birlese otyryp ótkizýde. Atalmysh joba daryndy oqýshylar men talantty shákirtterdi anyqtaý jáne olardy qoldaý, ıntellektýaldy saıystarǵa qatysýyn yntalandyrý maqsatynda uıymdastyrylyp otyr.
Olımpıadanyń Ahmet Baıtursynuly esimimen atalynýynyń ózi de uıymdastyrýshylarǵa zor jaýapkershilikti júkteıdi. Internet arqyly bilim alý qol jetimdi bolǵan zamanda mundaı jobalardyń ataýyna da mán bergen jón. Sol sebeppen til ǵylymdarynyń negizin salýshy A.Baıtursynuly esimimen ataǵandy jón kórdik. Olımpıadada oqýshylarǵa qazaq tili men ádebıetinen jáne oqý saýattylyǵynan tereńdetilgen suraqtar beriledi,- deıdi joba avtory Berikbol Tólegen.
Atalmysh olımpıadaǵa 5-11 synyp oqýshylary qatysyp, «jeńil, ortasha, kúrdeli jáne óte kúrdeli» deńgeıdegi test tapsyrmalaryn oryndaı alady.
Olımpıadada úzdik dep tanylǵan oqýshylarǵa «Ahmet Baıtursynuly atyndaǵy» stıpendıa jáne İ,İİ,İİİ dárejeli dıplomdar taǵaıyndalady. Tuńǵysh uıymdastyrylyp otyrǵan olımpıada 30 sáýirge deıin jalǵasady.
