Elimizdiń eleýli merekesi Jeńis kúni taban tirep keledi. Ekinshi dúnıe júzilik soǵysta búgingi beıbit kún úshin denelerin otqa tosqan ár azamattyń erligi urpaqtarynyń jadynda máńgi qalary sózsiz. Ataýly merekege oraı elimizdiń ár qalasy qyzý daıyndyqqa kirisip te ketti. Astana, Shymken syndy el qalalary "Jeńis lentasyn" taratyp, turǵyndarǵa erlik kúnin eske salýdyń amaldaryn qarastyrýda.

Endigi másele "Jeńis lentasy" jaıynda bolmaq. Eske sala keteıik, osydan birneshe jyl buryn osy merekege oraı Qazaqstannyń ár buryshy qońyr-sary tústes "Georgıı lentasymen" qaptalyp edi. Alaıda, bul lentanyń túpki maǵynasyn túsingen bılik ókilderi odan bas tarqan. Muny eskergen «Aq jol» partıasy elimizdiń týy tústes Jeńis lentasyn oılap tapqan. Bul oı qazaqstandyqtardyń kóńiline maıdaı jaǵyp, 2015 jyldan beri kók tústi "Jeńis lentasy" ataýly kúnniń esteligin ulyqtaıtyn sımvolǵa aınaldy.

Ne kerek, keı mekemelerdiń basshylyǵy mundaı sheshimge asa mán bermegen bolý kerek. Abaı men Fýrmanov kósheleriniń qıylysynydaǵy Fransýz úıiniń basshylyǵy Eıfel munarasynyń aldyna jarqyratyp Georgıı lentasyn ilip qoıypty. Bul neni bildiredi, áli de Reseıdiń yǵyna kónip, el táýelsizdigin moıyndamaýdyń belgisi me? Abyroı bolǵanda, muny qala ákimdigi baıqap, dereý alyp tastaýdy buıyrǵan. Búginde ǵımarat aldynda "Georgıı" lentasyn alyp tastaý jumystary júrigizildi.

Tarıh - adamzat balasyn otansúıgishtikke, patrıottyqqa tárbıeleıtin qaınar kóz. Ony dáriptep júrý urpaqqa mindet, degenmen qur sózben aýyz toltyryp aıtý azdyq etedi. Bir kezderi "Georgıı" lentasyna qanshama qoǵam belsenidisi qarsy shyǵyp, Reseıdiń jymysqy saıasatyna balady. Naǵyz erliktiń týyn kókke jelbiretip júrý úshin ulttyq tarıhymyzdy tereńinen zerdelep, durys dáripteı bilýimiz shart.

Gúlim Jaqan