Ómirdiń naǵyz qaınaǵan qazany bazar-aý dep qoıamyn... Ózgelermen ıyq tiresip, áıteýir, sabylyp júrgen bir adam, tynymsyz tirshilik. Gúlge qonǵan ara sekildenip ári eń jaqsysyn, ári eń arzanyn izdegen satyp alýshy, óz taýaryn tıimdi ótkizýdi oılaǵan satýshy. Kózdegenderi qarama-qaıshy osy eki taraptyń kelisimge kele almaı janjaldasyp jatatyn sátteri de az emes. Biraq, meniń aıtatynym joǵarydaǵydaı keleńsiz jaǵdaı emes, kerisinshe janymyzda jaqsy adamdardyń da júrgenine eriksiz sendiretin oqıǵa...

Sol kúni, keshke jaqyn muǵalimniń tapsyrmasy boıynsha qalamyzdyń alpaýyt bazarlarynyń birine attanǵan edim. Ersili-qarsyly ótken adamdar tobyryn tamashalap, jazýǵa ilip alar eshteńe baıqamaǵan soń, kóńilim qulazyp qaıtpaqshy edim, kózim bir ájeıge tústi: ústine kıgen kıimi jupyny, júzi jabyrqaý. Bir-eki tozyǵy shyqqan kitap, eskileý qol saǵaty jáne kúmis alqasyn satpaqshy nıette otyr. Uzaq baqyladym. Eshkim de ájeıdiń taýaryna qyzyǵýshylyq tanytpady. Bazar tarap jatyr. Kúrsinip qoıyp, óz zattaryn jınaýǵa umtylǵan ájeıdiń nazaryn bir jas boıjetken bóldi. Ekeýi az-aq sóılesip, baǵanaǵy arý ájeıdiń bar taýaryn satyp alyp, kúmis alqasyn ájeıdiń tósine taqty da kókjıek jaqta ǵaıyp boldy. Baıqap qarasam, ájeı kózine jas alypty, keıinnen azyq-túlik dúkenine shapshań basyp attanyp ketti...

Ol kim ájeı, basynan qandaı jaǵdaı ótkenin bilmedim, biraq sol oqıǵa tunjyraǵan tumandy kúnde jaryq sáýlesin tógip, meniń janymdy jadyratty...

Jubandyqov Qýanyshbek

Jýrnalısıka fakúltetiniń 1 kýrs stýdenti