Jyl buryn San-Fransısko qalasynyń Erıka Karner esimdi turǵyny úıine jóndeý jumystaryn jasaýdy oıǵa alady. Jóndeý jumystaryn júrgizetin jumysshylar garajdyń ornyna da qazý jumystaryn júrgizgen. Qazý barysynda jumysshylar tańǵajaıyp dúnıege tap bolady, dep habarlaıdy Qamshy aqparattyq agenttigi.
Jumysshylar kishkentaı qyz jerlengen qabirdi tabady. Qabyr syrtyna mór basylǵany belgili bolyp otyr.
19 ǵasyrda bul jerde mola bolǵany anyqtaldy. Adamdardyń denesin basqa jerge kóshirý jumystary júrgizilgen, biraq osy jerde qalyp qoıǵandary da jeterlik.
Qyzdyń denesi jaqsy saqtalǵan. Onyń ashyq tústi shashtary lavanda gúlderimen kómkerilgen. Qabir ishinde máıittiń búıir jaǵy máńgi jasyl aǵashpen qorshalǵan. Jerleý barysynda máıitti bálzamdap qoıǵany anyq . Osynyń bárin eskere kele tabyttaǵy qyzdyń aýqatty otbasydan shyqqandyǵy kúmán týdyrmaıdy.
Tabyttyń Karner hanymǵa tıesili jerden tabylýyna baılanysty jergilikti bılik basyndaǵylar qyzdy basqa jerge jerleýge qol ushyn sozdy. Ruhsat alý úshin Erıkanyń biraz shyǵyndalǵany da ótirik emes. Erıka qyzdyń aty-jónin bilý úshin túrli analızderdi óz qarjysyna jasatqan. Sol kezde ǵana qyz balaǵa qaıtys bolǵany týraly kýálik berilip, jerleýge ruhsat berilgen.
Erıka ana retinde tabyttaǵy qyz aldynda ózin boryshty sezingen. Tipti qyzǵa Mıranda dep esim bergen. Alaıda analız qorytyndylary boıynsha qyzdyń esimi Edıt Kýk ekeni anyqtaldy. Edıt Kýk 1876 jyly 13 qazan kúni qaıtys bolǵany da málim bolyp otyr. Al ólimniń sebebi, juqpaly aýrýdan bolǵan.
Bolǵan oqıǵa BAQ ókilderi arqyly kópshilikke taraý nátıjesinde birneshe mekeme qarjylaı kómek kórsetý úshin Erıkaǵa habarlasqan.
Daıyndaǵan: Aıgerim Taýbaı
