Aldaǵy 2-3 jyl ishinde Qazaqstan men Ázerbaıjannyń ózara saýda aınalymy ulǵaıady. Bul týraly Qamshy aqparattyq agenttigi 24.kz-ke silteme jasap habarlaıdy. Ekonomıkalyq baılanysty arttyra túsý maqsatynda eki eldiń óndirýshileri jıi bas qosyp, qos tarapqa da tıimdi sharttarǵa qol qoıylyp jatyr. Ázerbaıjandyqtar Qazaqstandy áleýeti joǵary mańyzdy saýda áriptes retinde qarastyrady. Byltyr eki eldiń arasyndaǵy saýda aınalymy 124 mln dollardan asty. Onyń aldyndaǵy jylmen salystyrǵanda bul kórsetkish 8%-ǵa ósip otyr. Alaıda álemdegi ekonomıkalyq ahýal tómendemes buryn eki jaqty saýda 3 ese artyq bolǵan. Qazir taraptar burynǵy yntymaqtastyq deńgeıine qaıtý joldaryn qarastyrmaq.

Rýfat Mamedov, Ázerbaıjannyń eksportty qoldaý jáne ınvestısıalar qorynyń basshysy: - Biz Qazaqstannyń birqatar óńirimen eksportty retteýdi josparlap otyrmyz. Tek aýyl sharýashylyǵy ónimderin ǵana emes, ónerkásiptik taýarlardy da jiberemiz. Qazaqstandyq óndirýshilerdi óz elimizge shaqyryp, birneshe kelisimge qol qoıdyq.

Memlekettik statısıka komıtetiniń málimetterine úńilsek, 2017 jyldyń qańtar-sáýir aılarynda Qazaqstannyń Ázerbaıjanǵa eksporty jalpy shetelge jiberilgen taýarlardyń 2,5%-yn quraıdy. Ótken jylmen salystyrǵanda bul kórsetkish 2%-ǵa artyq. Ázirbaıjannyń da bul baǵyttaǵy jetistikteri az emes. Jergilikti ekonomıkalyq reformalardy taldaý ortalyǵynyń málimetterine súıensek, Qazaqstan eksporttyq tapsyrystar kólemi boıynsha kósh bastap turǵan 5 eldiń qataryna kiredi. Jaqynda Ázirbaıjanǵa jańa qazaqstandyq elektrovozdar jetkizile bastaıdy. Bul týraly kelisim 3 jyl buryn jasalǵan.

 Ekonomıkalyq baılanysty ári qaraı nyǵaıtý jospary úkimetaralyq komısıanyń kelesi otyrysynda qurylady. Ol úshin arnaıy jol kartasy ázirlendi.

Sholýshy: Aıgerim Taýbaı