1 shilde kúni saǵat 09.45-te Elbasynyń kitaphanasynda «Ashyq esik kúnderi» merekelik onkúndigi saltanatty túrde ashylady. Shara elordamyzdyń týǵan kúnine oraı uıymdastyrylǵan.
Onkúndiktiń ashylý saltanatyna Olımpıada chempıony, QR Parlamenti Májilisiniń depýtaty Serik Sápıev, QR eńbek sińirgen ártisi, áıgili opera ánshisi Maıra Muhamedqyzy, Qazaqstannyń Tuńǵysh Prezıdenti Qorynyń laýreaty, ataqty balet ártisi Dosjan Tabyldy jáne memlekettik organdardyń ókilderi, mádenıet pen sport qaıratkerleri, elordamyzdyń turǵyndary men meımandary qatysady.
Onkúndiktiń ashylý baǵdarlamasynda Astana kúnine oraı uıymdastyrylǵan kórme men ekspozısıalar boıynsha ekskýrsıalar, «Qazaq konserti» orkestri men túrli baıqaýlardyń jeńimpazy atanǵan ánshiler men bıshilerdiń oryndaýyndaǵy mýzykalyq baǵdarlama, zıatkerlik oıyndar men vıktorınalar josparlanǵan.
Onkúndik barysynda buqaralyq, mádenı-tanymdyq sharalar josparlanǵan. Kitaphanaǵa kelýshiler úshin «Elbasy jáne Astana» taqyrybynda biregeı ári keshendi kórme uıymdastyrylǵan. Onda kópshiliktiń nazaryna 60 basylym, 47 arhıv materıaldary, mýzeı jınaǵynan 30 jádiger usynylady. Kórme negizgi 3 bólimnen turady: «Astananyń qalyptasýy», «Astananyń qaıtalanbas beınesi» jáne «Astana – álemdik únqatysý alańy». Barlyq materıaldar bas qalanyń qalyptasý kezeńderin jáne ony damytýda Elbasynyń ólsheýsiz eńbegin pash etedi.
Ózindik kózqarasy bar áýesqoı fotosýretshiler anyqtalmaq. «Máńgilik el» saltanat qaqpasy qazaqstandyqtardyń kózimen» taqyrybyndaǵy fotobaıqaýdyń jeńimpazdary marapattalady. Onyń barysynda elimizdiń turǵyndary joldaǵan eń úzdik jumystar pash etiledi.
Onkúndik aıasynda bilimin synaýǵa nıet bildirgender úshin «iDos» gıd-roboty zıatkerlik vıktorına ótkizip, minsiz jaýap bergenderge sertıfıkat tabystaıdy.
Eńseli elordanyń aıaqqa nyq turýy men damýy 3 shilde kúni «Astana – Qazaqstannyń strategıalyq vektory» dóńgelek ústeline arqaý bolmaq. Mańyzdy basqosýda ózderiniń derekteri men dáıekterin halyq qalaýlylary, sarapshylar men ǵalymdar ortaǵa salady.
Qazaqstandyq jas daryndar ózderiniń ónerlerin «Juldyzdy qala – Astana» balalar merekesinde 4 shilde kúni saǵat 10.00-de pash etedi.
3 jáne 5 shilde kúnderi Kitaphana qabyrǵasynda Kıno kúnderi ótedi. Onyń barysynda «Elbasy joly» kınoepopeıasynyń fılmderi kórsetiledi.
Onkúndik shildeniń 1-nen 10-na deıin jalǵasady. Onyń aıasynda taqyryptyq jáne sholý ekskýrsıalary ótkiziledi.
