Astanadaǵy Oqýshylar saraıynda Elbasy Nursultan Nazarbaev týraly «O velıkoı jıznı» - «Uly adam týraly ulaǵatty kitap» atty týyndynyń tusaýkeseri ótti, dep jazady Qamshy aqparat agenttigi. Bul týraly QazAqparat jazady.

Kitaptyń avtory - Reseı Federasıasynyń eńbek sińirgen mádenıet qaıratkeri, tarıhshy, jazýshy, pýblısıs Nıkolaı Aleksandrovıch Zenkovıch. Tusaýkeser barysynda avtor kitapty shyǵarýdaǵy basty ıdeıa, Memleket basshysynyń ómirindegi sújettik jelige engen negizgi oqıǵalar týraly baıandady.

«Nursultan Nazarbaev týraly eshkimniń oǵash pikir aıtqanyn estigen emespin. Qoǵamdyq pikir degen osy. Nursultan Nazarbaev týraly qoǵam oıynyń ózgergenin de estigenim joq. Ol halqyn, halqy Memleket basshysynyń qadirin biledi. Qazaqstan Prezıdenti eli jolynda baryn salyp keledi. Men Prezıdenttiń ómirin 1996 jyldan beri zerttep kelemin. Prezıdent bolý óte qıyn jumys. Sheteldik prezıdentterdiń Nursultan Ábishuly týraly burynnan beri aıtyp kele jatqan pikirlerin jınaqtadym. Uly adamǵa degen qurmetimmen kitapty jazyp shyqtym», - deıdi Nıkolaı Zenkovıch.

Reseılik jazýshynyń kitabyn qazaq tiline belgili QR eńbek sińirgen qaıratkeri, qalamger, belgili jýrnalıs, pýblısıs Qaınar Oljaı aýdarǵan. Týyndy qazaq jáne orys tilinde de eki myń tırajben jaryqqa shyqty.

Aıta keteıik, «Uly adam týraly ulaǵatty kitap» - Táýelsiz Qazaqstannyń tarıhyndaǵy Memleket basshysy týraly jasy 12-den asqan jas jetkinshekterden joǵary aýdıtorıaǵa arnalǵan alǵashqy týyndy. Sondaı-aq, ol joǵary synyp oqýshylary men KTÝ oqýshylary úshin daıyn oqý quraly bolyp tabylady.