Astana ákimi Áset Isekeshevke jergilikti turǵyn shaǵymdanyp, qaladaǵy túrǵyn úılerdiń aýlalarynda úısizderdiń órip júrgenin, olardyń kóshe ortasynda uıyqtap jatatynyn aıtty, - dep habarlaıdy Qamshy aqparattyq agenttigi Tengrinews.kz saıtyna silteme jasap. 

Beıbitshilik kóshesindegi №31 úıdiń turǵyny Qaırat Qudaıbergenov №28 úıdiń aýlasyndaǵy oqıǵany vıdeoǵa túsirip, ony Facebook jelisine júktegen. Ol vıdeoda Áset Isekeshevtiń atyn atap, belgisiz bireýlerdiń aýlada jaıylyp turǵan jýylǵan kıimdi urlap ketkenin aıtyp shaǵymdandy. Sonymen birge, ol úısizderdiń aýlaǵa qonystanyp alǵanyn da kórsetti. Vıdeonyń kúndizgi ýaqytta túsirilgenine qaramastan, ondaǵy adamdardyń barlyǵy shyr uıqyda jatyr.  

Áleýmettik jelide jarıalanǵan vıdeo boıynshaqala ákimi birden áreketke kóshti. Keıinirek İshki ister departamentiniń ókilderi de vıdeoǵa jaýap jazdy. 

"Polıseıler sol aýmaqta reıd júrgizip, qubyr ústinde uıyqtap jatqan adamdar Beıbitshilik jáne Jangeldın kóshelerindegi úılerdiń turǵyndary ekenin anyqtady. Olardyń ekeýi buryn Astananyń esirtkige táýeldilik pen psıhıatrıa otalyǵynda májbúrli túrde emdelgen. Bul adamdar medısınalyq kýálándirý alý úshin ortalyqqa jetkizildi.

Rolık avtorynyń zattary joǵalǵany týraly aryzy qabyldandy. Qylmystyń betin ashý boıynsha tergeý júrip jatyr", - deıdi Astana İİD-niń baspasóz hatshysy Sofá Kolyshbekova. Rolık avtory Qaırat Qudaıbergenov búgin Facebook jelisinde jańa vıdeo jarıalap, Astana ákimine máseleniń jyldam sheshilgenine alǵysyn bildirdi.