Qazaqstannyń 18 mıllıonynshy turǵyny dúnıege keldi. 18 mıllıonynshy turǵyn osy jyldyń 11 mamyrynda dúnıege keldi dep habarlaıdy Qamshy aqparattyq agenttigi QR UEM baspasóz qyzmetine silteme jasap.
Ulttyq ekonomıka mınıstri Tımýr Súleımenovtiń aıtýynsha, «QR Ulttyq ekonomıka mınıstrligi Statısıka komıtetiniń derekteri boıynsha 2017 jylǵy mamyrda Qazaqstan halqynyń sany 18 mıllıon adamǵa jetti, al 18 mıllıonynshy turǵynnyń týǵan kúni 2017 jyldyń 11 mamyryna saı keldi.
18 mıllıonynshy turǵynnyń týǵan kúnin anyqtaý barlyq demografıalyq oqıǵalardy: halqy sanynyń ósim (týý jáne ımıgrasıa) jáne tómendeý (ólim jáne emıgrasıa) komponentterin eskere otyryp jasaldy. Komıtet 18 mıllıonynshy turǵyndy AHAT organdary 2017 jylǵy 11 mamyrda tirkegen týý týraly akt jazbalary málimetteri negizinde qalyptastyrylǵan týǵan kúnder bazasyndaǵy balalardy izdeý jolymen anyqtady. Kandıdatýra olardyń analarynyń turǵylyqty jerine (qalalyq/aýyldyq jer), olardyń bilim deńgeıi men kásipter túrine, sondaı-aq jańa týǵan nárestelerdiń jynysy, salmaǵy men boıyna qaramastan, tutastaı alǵanda respýblıka boıynsha anyqtaldy.
18 mıllıonynshy turǵyn Almaty oblysy Taldyqorǵan qalasynda týǵan. Esimi Mýslıma Samatqyzy. Mýslıma otbasyndaǵy ekinshi náreste. Týǵan kezde náresteniń salmaǵy 3300 gram, al boıy 51 sm boldy. Náresteniń ata-anasy Taldyqorǵan qalasynda turady: anasy – Omarhanova Dıana Erıkqyzy – defektolog, 1991 jyly týǵan, ákesi – Bestybaev Samat Erkınbekuly – muǵalim, 1982 jyly týǵan.
Jalpy, Táýelsizdik jyldary ishinde halyq sany 1 562,5 myń adamǵa nemese 9,5%-ǵa ósip, osy jyldyń 1 maýsymynda 18 014,2 myń adamdy qurady.
1991 jylymen salystyrǵanda týǵandar sany 353,2-den 400,7 myń adamǵa nemese 13,5%-ǵa ósti.
Qarastyrylyp otyrǵan kezeńde qaıtys bolǵandar sany 2,3%-ǵa azaıyp, 2016 jyly 131,2 myń adamdy qurady.
Ólim-jitimniń jalpy koefısıenti 1000 adamǵa shaqqanda 1991 jylǵy 8,2-dan 2016 jylǵy 7,4 qaıtys bolǵandarǵa tómendedi. Náreste ólim-jitimi jańa týǵan 1000 nárestege shaqqanda 1991 jylǵy 27,3-ten 2016 jyly 8,6-ǵa deıin azaıdy.
Halyqtyń ómir súrý uzaqtyǵy 1991 jylmen salystyrǵanda 4,7 jylǵa, onyń ishinde erlerde – 5,3, áıelderde 4,5 jylǵa ósti. 2016 jyly ómir súrý uzaqtyǵy 72,3, erlerde – 67,9, áıelderde – 76,9 jyldy qurady.
Sholýshy: Aıgerim Taýbaı
