«Nur Otan» partıasy Pavlodar oblystyq fılıalynda Astana kúni qarsańynda jańa múshelerdi qabyldaý rásimi ótti, dep habarlaıdy  Qamshy aqparattyq agenttigi pavlodarnews.kz-ke silteme jasap.  

Partıa Pavlodar qalalyq fılıalynyń tóraǵasy, qala ákimi Nurjan Áshimbetov óz sózinde qatysýshylardy quttyqtap, Memleket basshysynyń táýelsiz Qazaqstan irgesiniń qalanýyndaǵy erekshe rólin atady. – Astana – eldigimizdiń nyshany, bereke-birligimizdiń uıytqysy, abyroıymyzdyń aıǵaǵy. Búgingi tańda eldiń tóri - Elordamyz barsha ult pen ulystyń basyn qosqan birlik mekenine aınaldy. Táýelsiz memleketimizdiń bas qalasy qazirgi tańda álem tanyǵan ásem, sáýletti, mádenı ortalyq. Bul turǵyda el múddesi úshin aıanbaı eńbek etken Elbasymyzdyń eńbegi orasan zor, - dedi «Nur Otan» partıasynyń Pavlodar qalalyq fılıalynyń tóraǵasy, qala ákimi Nurjan Áshimbetov.

Ári qaraı qalalyq fılıal tóraǵasy partıanyń jańa 15 múshelerine partıa bıletterin tabys etti. Olar túrli kásipter men salalar ókilderi. Solardyń arasynda Astananyń qurdasy Mashına jasaý kolejiniń túlegi Sherhan Asylhanov ta bar. 6 shilde kúni Sherhan da 19 jasqa tolady. – Senimderińiz úshin rahmet. «Nur Otan» qataryna ený men úshin úlken abyroı. Senimdi aqtaý úshin barymdy salamyn, - dedi Sherhan. Odan ózge, shara barysynda partıanyń oblystyq fılıaly tóraǵasynyń orynbasary Juldyz Táıkebaeva eńbek ardageri Ábjan Shahmatalınov, «AltaıAgroImpeks» JSHS dırektory Pavel Andrýsenko jáne Pavlodar oblysy Aýǵan jáne lokaldyq soǵysynyń ardagerleri men múgedekteri qoǵamdyq qory tóraǵasynyń orynbasary Tólegen Kókimbaevqa partıanyń oblystyq fılıaly atynan Alǵys hattaryn tabys etti. Kesh merekelik konsertke ulasty.

Sholýshy: Aıgerim Taýbaı