Aqtóbe oblystyq qylmystyq ister jónindegi mamandandyrylǵan aýdanaralyq sotynda ákesi men inisin óltirgen Medet Tapaevqa qatysty qylmystyq is qaralyp jatyr. Ol ishimdik iship, bir kúnde ákesi men inisin pyshaqtap óltirgen, dep habarlaıdy Qamshy.kz aqparat agenttigi QazAqparatqa silteme jasap.

Sottalýshy Medet Tapaev buryn isti bolǵan. Tipti 12 jylǵa bas bostandyǵynan aıyrý jazasy taǵaıyndalyp, keıin merziminen buryn shartty túrde bostandyqqa shyǵarylǵan. İs materıaldaryna súıensek, Medet Tapaev osy jyldyń sáýir aıynda Aqtóbe qalasynda turatyn ata-anasynyń úıine baryp, azamattyq nekedegi jubaıyna tamaq pisirýdi buıyrady. Keıin ata-anasy men baýyrlarynyń uıyqtap jatqanyna qaramastan olardyń tynyshtyǵyn buzyp, jubaıyn balaǵattaǵan. Osy kezde ákesi Serik Tapaev oıanyp ketip, «ishimdik ishkenshe, tabys taýyp, otbasyńdy asyra» dep ulyna urysyp, ony kóseýmen urady. Sol kezde ashýǵa býlyqqan sottalýshy Medet Tapaev ákesine pyshaq ala júgiredi. Áke men bala arasyndaǵy janjalǵa inisi Manas Tapaev aralasyp, aǵasyn toqtatpaq bolǵan ol birneshe dene jaraqatyn alady. İnisin pyshaqtap, keıin sháınekpen basynan uryp, mert qylady. Sol kúni oqıǵa ornynda Serik Tapaev qaza bolyp, inisi Manas Tapaev arada 5-6 saǵat ótkende aýrýhanada esin jımastan kóz jumdy. Bul oqıǵanyń bári anasynyń, qaryndasynyń, azamattyq nekedegi áıeliniń kóz alynda bolǵan.

«Eki azamatymdy óltirdi. Pyshaqtap, sháınekpen urdy. Ulym Manastyń artynda eki balasy qaldy. Nemerem ákesin suraıdy. Biz «jumysta» dep aldap kelemiz. Medetti keshirmeımin. Jaýyzdyqpen kóz aldymda óltirdi ǵoı. Keshirim joq. Máńgilikke ketsin, kózime kórinbesin. Biz qorqyp, úreılenip otyramyz»,- dedi sottalýshynyń anasy, jábirlenýshi R.Tapaeva.

Aıta keteıik, Medet Tapaev Qylmystyq kodekstiń «Adam óltirý» baby boıynsha aıyptalyp jatyr. Memlekettik aıyptaýshy jaryssóz kezinde M.Tapaevty 23 jylǵa bas bostandyǵynan aıyrý jazasyn surady. Ony májbúrli túrde ishimdikten emdetip, qaýiptiligi tótenshe túzeý mekemesinde jazasyn óteýdi surady.