Roskomnadzor basshysy Aleksandr Jarov eger de zańnyń talabyn oryndamasa, Facebook jelisi Reseıde buǵattalatynyn aıtty, dep habarlaıdy Qamshy.kz aqparat agenttigi Rıa novostı saıtyna silteme jasap.

«Zań barlyǵyna birdeı, sondyqtan da kompanıa zańnyń kez kelgen talabyna jaýap berýi tıis. Olaı bolmaǵan jaǵdaıda, Facebook jelisi Reseı jerinde óz jumysyn toqtatady», - deıdi Jarov.

Onyń aıtýynsha, atalmysh jeli Reseıde óte tanymal, kóp qoldanysqa ıe jáne muny bılik jaqsy biledi.

«Alaıda áleýmettik jeli tek bireý ǵana emes, basqa da jeliler kóp. Sol sebepti Facebook kompanıasy 242-shi zańdy qatań ustanǵanyn talap etemiz», - dep qosa aıtyp ótti Aleksandr Jarov.

Belgili bolǵandaı, kompanıa zańnyń talabyna tolyqqandy jaýap berý úshin barlyq jaǵdaıdy jasap otyr eken.

«Olardan bizge resmı hat kelip túsken joq. Biz 2017 jyldyń sońyna deıin atalmysh jelini baqylaýda ustap, tekserip otyramyz, al 2018 jylda oılanyp kóremiz», - deıdi Jarov.

Zańda reseılikterdiń jeke málimetterin el shekarasynda qupıa ustaý talap etiledi. Roskomnadzor zańyn buzǵan jeliler arnaıy tizimge enip, buǵattalatyn bolady.