Budan bylaı qazaqstandyq quzyrly organdar shetelden kelgen etnıkalyq qazaqtardan sottalmaǵany týraly anyqtamany talap etpıtin boldy dep súıinshileıdi Qamshy.kz aqparat agenttigi. İshki ister mınıstrliginiń kóshi-qon polısıasynan Qamshy.kz aqparat agenttigine kelgen hatta Qytaı Halyq Respýblıkasynan kelgen etnıkalyq qazaqtardan «Sottylyq týraly» anyqtamany talap etpeıtini jazylǵan.
Qandastarymyzǵa turaqty tirkeýge turyp, yhtıar hat alǵanda atalmysh anyqtamany kórsetýi mindettelmeıdi.
«Sottylyq týraly» anyqtamany talap etýdiń kúshin joıý týraly talaı márte aıtyldy. Atalmysh másele 2015 jyldan beri talqylanyp keledi. Osy ýaqytqa deıin qandastarymyz «sottylyq týraly» anyqtamany rastatý úshin talaı mashaqatty bastan ótkerdi. Ol úshin qandastaramyz keń baıtaq Qazaqstannyń túkpir-túkpirinen Astana men Almatyǵa sabylýyna týra keldi.
Eger Nursultan Nazarbaev Astanada ótken Dúnıejúzi qazaqtarynyń V quryltaıynda ózekti órtegen másele týraly aıtpaǵanda bul másele áli de sheshilmes pe edi?
Esterińizge sala keteıik, 23 maýsymda ótken Dúnıejúzi qazaqtarynyń V quryltaıynda Elbasy Nursultan Nazarbaev etnıkalyq qazaqtardyń qujatty rásimdeý kezinde sabylmaýy kerek ekenin basa aıtty.
«Elge kelgennen soń qujat túgendeý úshin ári-beri sabylý bolmaýy kerek. Qytaı qazaqtarynyń sottalǵany nemese sottalmaǵany týraly anyqtama alý jaıy aǵaıynnyń arǵy bettegi eńbegine problemalar týǵyzady. Ony shekara turǵysynan sol jerde anyqtap, elmenen aqyldasyp, kelisip sheshý kerek!» - dep tapsyrma berdi Nazarbaev.
Dúnıejúzi qazaqtarynyń V quryltaıyndaǵy Memleket basshysynyń tapsyrmasyn oryndaý úshin Qytaıdan kelgen etnıkalyq qazaqtardan Qazaqstan Respýblıkasynda turaqty turýǵa ruqsatty alý kezindegi sottylyǵy týraly anyqtamany talap etýdi alyp tastaýdy kózdeıtin «Sheteldikterge jáne azamattyǵy joq azamattarǵa Qazaqstan Respýblıkasynda ýaqytsha jáne turaqty turýǵa ruqsat berý qaǵıdattaryn bekitý týraly» Qazaqstan Respýblıkasy İshki İster mınıstrliginiń 2017 jylǵy 2 tamyzdaǵy №529 buıryǵy bekitilip, Ádilet mınıstrliginde 2017 jyldyń 6 qyrkúıeginde tirkeldi. Osy buıryq negizinde Qytaıdan kelgen etnıkalyq qazaqtardan sottylyǵy týraly anyqtama endi talap etilmeıdi.
QR İshki ister mınıstrliginiń Qamshy.kz-ke bergen málimetine sáıkes, atalǵan buıryqty bekitpes buryn, Qytaıdan bólek ózge elderden keletin etnıkalyq qazaqtardyń da qujat rásimdeýdegi jaǵdaılary qarastyryldy. Soǵan sáıkes, ózge elderde mundaı anyqtama esh kedergisiz beriletini anyqtaldy. Ózge elderden kelgen etnıkalyq qazaqtar sottylyǵy týraly anyqtamany ózderi turǵan elden esh kedergisiz jáne ýaqyt joǵaltpaı ala alady. Basqa elderden kelgen etnıkalyq qazaqtardan sottylyǵy týraly anyqtamany talap etpeý máselesin İİM múddeli memlekettik organdarmen birlese jan-jaqty zerdelegende osyndaı jaıttar anyqtaldy.
Ásem Álmuhanbet
