Aqtóbelikter Levon Mırzoıannyń eskertkishin alyp tastaýdy talap etti. Talaı qazaqtyń ólimine sebepshi bolǵan adamdy ulyqtaýdyń qajeti joq dep sanaıdy jurt. Biraq munymen armán dıasporasynyń ókilderi kelispeıdi. Kersinshe «Myrzajan» atymen málim Mırzoıannyń kúnási áli anyqtalmady degen pikirde. Dese de memlekettik ınspektorlar qalanyń qaq ortasyndaǵy kóktastyń zańsyz ornatylǵanyn málimdedi, - dep habarlaıdy Qamshy.kz aqparat agenttigi KTK telearnasyna silteme jasap.
Telearna tilshileriniń málimetinshe, qazir Aqtóbeniń qaq ortasyndaǵy bul kóktasty joq qylýdy qalaıtyndar kóp. Ásirese, qýǵyn-súrgin qurbandary urpaqtarynyń janyn jegideı jep júr. Óıtkeni, Qazaqstandy 30-jyldardyń aıaǵynda basqarǵan Levon Mırzoıannyń kesirinen myńdaǵan adamnyń jazyqsyz atylǵany qujattarmen aıǵaqtalǵan. "Qyzyl terrordy" uıymdastyrýǵa belsene atsalysqan adamdy ulyqtaýǵa negiz joq ekenin aıtady.
"Bul qazaq halqyn bir qolymen basynan sıpap, ekinshi qolymen qandy qolymen qazaqtyń talaı belsendilerin, talaı atalarymyzdy qyrǵany belgili bolyp tur. Nege solardy qyrǵan adamǵa qalanyń qaq ortasynan eskertkish qoıady? Nege oǵan kóshe beriledi? Bizder osy bılikten zańdy turde osy eskertkishti alýyn talap etemiz. Suramaımyz, talap etemiz", - deıdi Aqtóbe qalasynyń turǵyny Baqytjan Qurmanov.
Sondaı-aq, Levon Mırzoıanǵa arnalǵan eskertkishtiń osydan týra 20 jyl buryn qalanyń qaq ortasyna ornatylǵany aıtylady. Ony kók tastan qashatyp, keter qarajatyn barlyǵyn jergilikti kásipker Treterán óz moınyna alǵan eken. Ol mesenattyǵy týraly eskertkishtiń tómengi bóligine jazdyryp ta qoıǵan.
Dál osy eskertkishti súrip tastaýǵa armán dıasporasyndaǵylar qarsy. Tipti Mırzoıannyń kúnásin keshý kerek degendi aıtady.
"Biz kóshe aty men eskertkish burynǵy qalpynda qalý kerek dep esepteımiz. Sebebi, beıkúná adam bolmaıdy. Kúnási bolsa, istegen jaqsylyǵymen de tarazylap kórý kerek", - deıdi Aqtóbe oblystyq armán dıasporasy aqsaqaldar alqasynyń tóraǵasy Arýtún Mıkaelán.
20 jyl boıy qalanyń qaq ortasynda turǵan bul eskertkish esh jerde tirkeýde joq. Mamandar onyń zańsyz ornatylǵanyn endi aıtyp otyr.
"Levon Mırzoıannyń eskertkish belgisi birinshiden Aqtóbe oblysyndaǵy jergilikti mańyzy bar tarıhı jáne mádenı eskertkishter memlekettik tizimi degen bar. Bul eskertkish belgi sol tizimde joq. Sondyqtan da ony alyp tastaýǵa bolady", - deıdi Aqtóbe oblystyq tarıhı-mádenı muralardy qorǵaý jónindegi memlekettik ınspeksıasynyń bas ınspektory Farhad Dosmuratov.
Aqtóbelikter bólshevıktiń atyndaǵy kóshe ataýyn da ózgertýdi birneshe jyl boıy bılikten surap keledi. Ázirge qalalyq máslıhat depýtattary ǵana Mırzoıan kóshesin Alash kósemi Álıhan Bókeıhanǵa berýge sheshim shyǵardy. Biraq oblystaǵy áriptesteri men onomastıkalyq komısıadan habar bolmaı otyr
