Nurlan Ermekbaev Qyrǵyzstanǵa jumys sapary barysynda Qyrǵyzstan Respýblıkasynyń Din isteri jónindegi Memlekettik komısıasynyń dırektory Zaıyrbek Ergeshovpen kezdesti dep habarlaıdy Qamshy.kz aqparat agenttigi. Eki eldiń vedomstva basshylary QR Din isteri jáne azamattyq qoǵam mınıstrligi men Qyrǵyzstan Respýblıkasynyń Din isteri jónindegi Memlekettik komısıasy arasyndaǵy áriptestik jónindegi memorandýmǵa qol qoıdy.

Atalǵan memorandým tájirıbe, aqparat almasýdy jáne eki memlekettiń din salasyndaǵy memlekettik saıasat tujyrymdamalarynda kózdelgen is-sharalar josparlarynyń oryndalýyn baqylaý jáne júzege asyrýdy kózdeıdi.  

«Qujatta, biz eki memlekettiń múddesi úshin din salasyndaǵy memlekettik saıasatty tıimdi iske asyrý úshin yntymaqtastyqtyń barlyq aspektilerin keńinen qamtýǵa kúsh saldyq»,- dep atap ótti mınıstr Nurlan Ermekbaev.

Memorandýmnyń mańyzdy tarmaqtarynyń biri - dinı salany retteýdegi ýákiletti memlekettik organdardyń yntymaqtastyǵy, halyqty teris dinı ıdeıalardan qorǵaý, sheteldik dinı ekstremıstik uıymdardyń yqpalyna ushyraǵan adamdarǵa durys baǵytta keńes berý jáne deradıkaldandyrý jónindegi jumys sheńberinde ózara is-qımyl jasaý jáne tájirıbe almasý.

Sonymen birge, memorandým memleketter arasyndaǵy teologıalyq (rýhanı) jáne dinı zertteýlerdi damytý salasyndaǵy yntymaqtastyqty nyǵaıtýǵa baǵyttalǵan. Memorandým aıasynda halyqty dinı tárbıeleýge jáne konfesıaaralyq kelisimdi nyǵaıtýǵa baǵyttalǵan birlesken ǵylymı turǵyda bilim berý baǵytyndaǵy is-sharalardy ótkizý josparlanyp otyr.

Sondaı-aq bekitilgen memorandým, dinı salaǵa qatysty ǵylymı, kórkem, saraptamalyq ádebıetterdi jáne basqa da aqparattyq materıaldardy jasaý, taratý jáne jarıalaý múmkindigin nyǵaıtýǵa serpin bolmaq. 

Aıta keteıik, búgin Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev Bishkek qalasynda ótken «Qazirgi zamanaýı zaıyrly memlekettegi Islam» taqyrybynda uıymdastyrylǵan Halyqaralyq konferensıaǵa qatysty.