Elbasy tapsyrmasymen QR Premer-Mınıstri Baqytjan Saǵyntaev Ońtústik Qazaqstan oblysyna bardy, dep habarlaıdy Qamshy.kz aqparat agenttigi QR Premer-mınıstriniń saıtyna silteme jasap.
Úkimet basshysy «Qazaqstannyń úshinshi jańǵyrýy: jahandyq básekege qabilettilik» Joldaýynyń, sondaı-aq AÓK-ni damytý jáne «Nurly jol» memlekettik baǵdarlamalarynyń, «Nurly Jer» turǵyn úı qurylysy baǵdarlamasynyń, ónimdi jumyspen qamtý jáne jappaı kásipkerlikti damytý baǵdarlamasynyń iske asyrylý barysymen tanysady dep kútilýde.
Baqytjan Saǵyntaevtyń OQO-ǵa jumys sapary Túrkistan qalasynan bastaý aldy. Onda ónimderi oblystyń barlyq aýdandaryna jetkiziletin «Iassy nan» nan zaýytynda bolyp qaıtty.
Kásiporyndy aralaý barysynda «Aq jol» JSHS basqarýshy kompanıasynyń basshysy Sabyr Ataev Premer-Mınıstrge óndiristik sehtardy kórsetip, zaýyttyń qazirgi qyzmeti men ony jańǵyrtý keleshegi týraly aıtyp berdi.
«Aq jol» JSHS kásiporny nan-toqash jáne shujyq ónimderin shyǵarýmen aınalysady. Munda 2016 jyly - 288 mln teńgege, 2017 jyldyń segiz aıynda 839 mln teńgege ónim óndirildi. Kompanıa shaǵyn jáne orta bıznes pen jappaı kásipkerlikke memlekettik qoldaý kórsetýdiń jarqyn mysaly.
Budan keıin Baqytjan Saǵyntaev Túrkistannyń birqatar áleýmettik ınfraqurylym nysandarynda bolyp qaıtty, solardyń ishinde Q.A.Iasaýı atyndaǵy Halyqaralyq qazaq-túrik ýnıversıteti (HQTÝ) de bar. Onda ýnıversıtet rektory Ýálıhan Ábdibekov oqý ornynyń ınfraqurylymyn tanystyryp, JOO-nyń damýy men osynda qoldanylatyn bilim berý baǵdarlamalary týraly baıandady.
Búginde HQTÝ-da 1 myńnan astam oqytýshy jumys isteıdi, 105 mamandyq boıynsha shamamen 9 myń stýdent, sonyń ishinde 700-den astam sheteldik jas bilim alýda. Munda arnaıy ýnıversıtettik qalashyq turǵyzylǵan.
Budan keıin «Nurly jer» baǵdarlamasy aıasynda salynǵan «Otyrar» shaǵyn aýdanyna bardy. Túrkistan qalasynyń ákimi Álipbek Óserbaev Úkimet basshysyna qurylysy aıaqtalǵan úılerdiń birinde baspanalardyń sapasyn kórsetip, qalany damytýdyń perspektıvalyq-ınfraqurylymdyq josparymen tanystyrdy. Onymen qosa, ákim «Nurly jer» baǵdarlamasyn iske asyrý barysy týraly aqparat berdi.
Kúnniń ekinshi jartysynda QR Premer-Mınıstri jumys saparyn Shymkent qalasynda jalǵastyrady, onda birqatar keńester ótkizip, óndiristik jáne áleýmettik nysandardy aralaıdy.
