Mýmbaı temir jol vokzalynda jaıaý júrginshilerge arnalǵan eki stansıa arasyn qosatyn kópirde 22 adam qaza taýyp, 32-si aýyr jaraqattandy,- dep habarlaıdy Qamshy.kz aqparat agenttigi.

Qaıǵyly oqıǵa tańerteńgi asyǵys saǵattarda «Elphinstone» aıaldamasynda mańyzdy jergilikti joldardy qosatyn jerde oryn alǵan.

Senimdi aqparat kózderi «oqıǵanyń sebebi jaýynnan pana izdegen júrginshilerdiń bir orynǵa toptalýynan týyndady»,- dep otyr. Zardap shegýshiler eń jaqyn shaqyrymdaǵy aýrýhanaǵa jetkizilgen.

«Qaıǵyly jaǵdaı qatty jaýǵan nóserdiń áserinen bolǵan, júrginshiler kópirdiń astyna turaqtaǵan. Aldyńǵy qatarda turǵan adamdar jyǵylyp qalyp, artynda turǵandardy da qosa qulatqan. Olar atalmysh jerden esteri shyǵyp júgirip birin-biri ıtermelegen. Qaza tapqan 22 adam ishinde 14 erkek pen 8 áıel bar»,-dedi ındıalyq temirjol qyzmetiniń ókili Ravındra Bhakar.

Jaraqattanǵandardyń biri, Akash esimdi jigittiń aıtýynsha: «Jolaýshylar poıyzy aınalyp jatqan, keıbir júrginshiler aıaldamadan syrtqa shyqqysy keldi, alaıda basqalar olarǵa jol bermedi. Syrtqa shyǵamyn dep bettegen adamdardyń áreketteri panıkalyq jaǵdaı týǵyzdy».

Indıanyń Premer-Mınıstri Narendra Modı óziniń Tvıtterdegi jazbasynda «Mýmbaıda oryn alǵan qaıǵyly jaǵdaıda qaza tapqandardyń otbasyna kóńil aıtatyndyǵyn jáne jaraqattanǵandar men  qaza tapqandardyń jaqyn-týystaryna shama kelgenshe kómek kórsetetindigin» aıtty.