Búgin Ońtústik Qazaqstan oblysyna jumys sapary aıasynda QR Premer-Mınıstri Baqytjan Saǵyntaev óńir jurtshylyǵynyń qatysýymen týrızm men kásipkerlikti damytý, jumyspen qamtý men eńbek resýrstarynyń mobıldiligin arttyrý máseleleri boıynsha keńes ótkizdi. Bul jaıynda Qamshy.kz aqparat agenttigi Premer-mınıstrdiń saıtyna silteme jasap habarlaıdy.
Sharaǵa memlekettik organdardyń, OQO ákimdiginiń basshylary, óńirler ákimderiniń orynbasarlary, salalyq qaýymdastyqtardyń ókilderi, jumyspen qamtý ortalyqtarynyń dırektorlary, UKP, úkimettik emes uıymdar jáne BAQ ókilderi qatysty.
OQO ákimi Janseıit Túımebaev týrızmdi damytý jóninde baıandama jasady. QR Ulttyq ekonomıka mınıstri Tımýr Súleımenov QR Úkimetiniń elimizde kásipkerlikti damytý boıynsha atqaryp jatqan sharalary týraly baıandady. QR Eńbek jáne halyqty áleýmettik qorǵaý mınıstri Tamara Dúısenova jumyspen qamtý jáne ishki kóshi-qondy yntalandyrý sharalary týraly aıtyp berdi. QR Bilim jáne ǵylym mınıstri Erlan Saǵadıev «Serpin» áleýmettik jobasyn iske asyrý týraly esebin usyndy. QR Mádenıet jáne sport mınıstri Arystanbek Muhamedıuly týrısik salany damytýdyń keleshegi men qazirgi syn-tegeýrinderi taqyrybynda sóz qozǵady.
Keńes aıasynda «OQO týrızm ındýstrıasyn damytý ortalyǵy» qaýymdastyǵynyń prezıdenti Gúlmıra Aqberdıeva, BUU kóshi-qon agenttigi uıymynyń Ortalyq Azıa boıynsha úılestirýshisi Deıan Keserovıch, SQO ákiminiń orynbasary Asqar Saqypkereev, SHQO ákiminiń birinshi orynbasary Nurymbet Saqtaǵanov, sondaı-aq Ońtústik Qazaqstan oblysynan Soltústik Qazaqstan oblysyna qonys aýdarǵan, Ónimdi jumyspen qamtý jáne jappaı kásipkerlikti damytý baǵdarlamasynyń qatysýshysy Serik Janálıev sóz sóıledi.
Sondaı-aq, keńes qatysýshylary «Uly Jibek jolynda» biryńǵaı týrısik jobany iske asyrý keleshegi jáne eńbekke jumyldyrý máseleleri týraly pikir almasty.
Shara barysynda ótken jyldyń jeltoqsan aıynda Úkimet Memleket basshysynyń tapsyrmasy boıynsha Ónimdi jumyspen qamtý jáne jappaı kásipkerlikti damytý baǵdarlamasyn qabyldaǵany týraly aıtylyp ótti. Onda jumyssyz jáne ózin-ózi jumyspen qamtyǵan halyqty eńbek naryǵynda suranysqa ıe kásibı daǵdylarǵa jappaı oqytýǵa negizgi basymdyq berildi. Onymen qosa, baǵdarlama eńbekke jumyldyrýdy arttyrý máselesin de qamtıdy.
Budan ózge, óńirlerdi ekonomıkalyq damytýdaǵy ózekti jaǵdaılardy eskere otyryp, ishki kóshi-qon jaǵdaıyn jańartýǵa baǵyttalǵan Kóshi-qon saıasatynyń tujyrymdamasy qabyldandy.
Úkimet bıznesti damytý men qoldaý kórsetý turǵysynan jaǵdaıdy erekshe baqylaýda ustaýda, sonyń ishinde Ulttyq kásipkerler palatasynyń túrli alańdarda, QR Premer-Mınıstriniń el aımaqtary boıynsha jumys saparlary barysynda kótergen máseleleri Júıelik problemalar tizimine engizilgen. Atalǵan tizim 513 máseleden turady, olardyń 442-siniń búginde sheshimi tabylǵan, qalǵan máseleler boıynsha pysyqtaý jumystary júrgizilip jatyr.
Sonymen qatar damytýdyń perspektıvaly baǵyttarynyń biri retinde týrızm salasy atalyp ótti.
QR týrısik salasyn damytýdyń 2020 jylǵa deıingi tujyrymdamasynyń jobasynda 6 týrısik klasterdi qurý kózdelip otyr. Onda OQO «Uly Jibek jolyn qaıta jandandyrý» klasterine kiredi.
Oblystyń atalǵan klasterine Túrkistan qalasy, Otyrar jáne Saryaǵash aýdandary, «Aqsý-Jabaǵyly» jáne «Qarataý» qoryqtary, «Saıram-Ógem» memlekettik ulttyq tabıǵı parki kiredi.
Qorytyndylaı kele, aıtylǵan sharalardyń barlyǵy oblystyń ekonomıkalyq áleýetin damytýǵa qajetti jaǵdaılardy jasaýǵa baǵyttalǵany jáne júıeli negizde iske asyrylatyny atalyp ótti.
