Búgin, 30 qyrkúıekte Almaty oblysy Shamalǵan aýylynda Bolat Ábishuly Nazarbaevtyń demeýshiligimen, oblys ákiminiń qatysýymen turmys-jaǵdaıy tómen otbasylarǵa úı kiltteri tabystaldy. Atalǵan ıgi sharaǵa Qamshy.kz aqparat agenttiginiń tilshisi qatysyp, baspanaly bolǵan otbasylardyń qýanyshyna ortaqtasyp qaıtty.
Sharany Almaty oblysynyń ákimi Batalov Amandyq Ǵabbasuly óz quttyqtaý sózimen ashty. Oblys ákimi «Meniń úı kiltterin tapsyrýǵa shyn máninde quqyǵym joq. Úı kiltterin tabystaý úshin emes, raqmet aıtýǵa keldim»-deıdi. Ákim óz sózinde oblysta mektepterdiń kóptep salynyp jatqanyn, turǵyn úı baǵdarlamalary boıynsha úı salý qolǵa alynyp jatqanyn atap ótti.
Búginde ál-aýqaty, turmys jaǵdaıy tómen, múmkindigi shekteýli, kóp balaly otbasylarǵa arnap salynǵan 20 úıdiń 17-si paıdalanýǵa daıyn. Mańyzy zor, saýaby úlken is jasap, ál-aýqaty tómen otbasylarǵa úı salyp bergen Bolat Nazarbaev úı ıelerine kiltterdi ózi tabystady. Nurqanat Erzatuly, Mustapaev Shyńǵys, Tabýldınova Baqytgúl, Imanǵalıeva Baqyt, Maqsutova Zınat, Dúısenǵalıeva Tursynhan, Quttybaı Dilbar, Saǵyndyqov Raqym baspanaly boldy.
Jeti balanyń anasy Baqyt Imanǵalıeva bul qýanyshty sátti qatty kútkenin jáne úıge búginnen bastap kóshetinin jetkizdi: «Úı alatynymyzdy jaqynda ǵana habarlasyp aıtty. Buryn Bekbolatov aýylynda turdym. Onyń aldynda tek úmittenip júrgen bolatynbyz. Búgin buıyrsa úıge kirmekpin. Osyǵan deıin eshkimge habarlasyp jaǵdaıymdy aıtqan emespin. Bolat myrzany da búgin birinshi ret kórýim...»-deıdi ol.
Tabýldınova Baqytgúl: Úıge ıe bolǵanymdy osydan shamamen eki juma buryn ǵana bildim. Jeti balanyń anasymyn. Bizdi kóp adamdar biledi, solar jaǵdaıym týraly aıtqan bolýy kerek-, deıdi.
Bolat Nazarbaev pen oblys ákimi Amandyq Ǵabbasuly jáne «Asyl arna» telearnasynyń Bas dırektory Muhamedjan Tazabek tabystalǵan úılerge kirip, qonys ıelerin quttyqtady.
Barlyq páter sý qubyryna, elektr qýatyna qosylǵan jáne gazǵa jalǵanǵan. Ár úıdiń kólemi - 120 sharshy metr.
Nazerke MUSA
