Katalonıa turǵyndary Ispan úkimeti tyıym salǵan táýelsizdik referendýmyn júzege asyrý úshin saılaý ýchaskeleriniń aldynda jınaldy,- dep habarlaıdy Qamshy.kz aqparat agenttigi.
Aımaqtyq ókilder saılaý búletenderiniń daıyn ekendigin jáne nátıjeniń úlken ózgeris alyp keletindigin aıtty.
Madrıd úkimeti daýys berýdi toqtatýǵa ýáde berdi jáne ondaǵan polısıa kólikteri Barselona qalalyq portynda óz bazasyn ornalastyrdy.
Túnde myńdaǵan táýelsizdik úshin kúresýshiler daýys berý ortalyqtary retinde qoldanylatyn mektepterge jınaldy. Polısıa olardy shyǵaryp tastaıtyndyqtaryn aıtty.
Referendýmdy uıymdastyrýshylar halyqqa saılaý ýchaskelerine saǵat tańǵy 05:00-te jınalýdy surap, daýys berýdi saǵat 09:00-de bastaıtyndyqtaryn aıtqan. Olar kez kelgen polısıa áreketteriniń beıbit túrde bolýyn ótindi.
«Meni óz elim qajet etetindikten, erte turdym. Biz ne bolatynyn bilmeımiz, biraq biz munda bolýymyz kerek», - deıdi 65 jastaǵy Eýlalıa Espale I Tarro. Ol Barselonadaǵy saılaý bolatyn mekteptiń syrtynda kútip turdy.
Jeksenbi «demokratıa úshin asa mańyzdy kún», dedi aımaqtyq vıse-prezıdent, Orıol Djýnkýeras. «Biz kóptegen kedergilerdi jeńip shyqtyq, budan artyq bizdi eshteńe de asqaqtata almaıdy», - dedi ol. «Eger óz quqyǵymyzdy qorǵamasaq, onda kim biz úshin qorǵamaq?»
Búletenderde tek bir suraq jáne eki ǵana jaýap bar: «Katalonıanyń respýblıka túrinde táýelsiz memleket bolǵanyn qalaısyz ba?» - «Iá» nemese «Joq».
Referendým Ispanıanyń konstıtýsıalyq sotynda zańsyz dep jarıalandy jáne myńdaǵan qosymsha polısıa Katalonıaǵa jiberildi. Al qosymsha ofıserler Barselona portynda eki kemede kútip otyr.
Daýys berý qarsańynda ıspan birligin úgittegen myńdaǵan adam Ispanıanyń barlyq qalalarynda, sonyń ishinde Katalonıa astanasy Barselonada da sherýler ótkizdi.
Olar ıspan týyn jáne «Katalonıa ol - Ispanıa» degen jazýy bar bannerlerdi qolǵa alyp shyqty.
Madrıd úkimeti Katalonıada ortalyq, baqylaýshy polısıa qyzmetimen baılanysyp, tyıym salýǵa kómektesý úshin Mossos d'Ekvadrra aımaqtyq kúshin shaqyrdy. Sondaı-aq, Polısıa aımaqtyq úkimet telekomýnıkasıalyq ortalyǵyna da shoǵyrlandy.
Katalon polısıasynyń basshysy ofıserlerdi kúsh qoldanýdan aýlaq bolýǵa shaqyrdy.
Katalonıa - bul soltústik-shyǵys Ispanıada ornalasqan 7,5 mln. halqy bar óz tili men mádenıeti bar aımaq.
