Temirtaý men Qaraǵandy qalalarynyń arasyndaǵy avtojol ýchaskesi tolyǵymen 2018 jyly aıaqtalatyn bolady. Búgingi kúni ol jerde Ońtústik Koreıanyń merdiger kompanıasy jumys isteýde, ― dep habarlaıdy Qamshy.kz aqparat agenttigi QazAqparatqa silteme jasaı otyryp.

Aımaq basshysynyń baspasóz qyzmetinen málim etkendeı, jalpy oblys boıynsha respýblıkalyq mańyzdaǵy 477 shaqyrym jolǵa jóndeý jumystary júrgizilýde. «Ortalyq-Ońtústik» kólik dáliziniń ýchaskelerin qaıta jóndeý «Nurly jol» baǵdarlamasy sheńberinde júzege asyrylýda. «Búgingi kúni «Anar-Temirtaý» jolynyń 74 shaqyrymy tolyǵymen jóndeldi. Qazir «Batpaq-Baımyrza» ýchaskesiniń jańadan tóselgen 34 shaqyrymyn qoldanysqa berý josparlanýda.

Budan bólek, 15 shaqyrymdyq «Temirtaý-Qaraǵandy» ýchaskesin qaıta jóndeý jalǵasýda», ― dep atap ótti «QazAvtoJol» UK» AQ-nyń Qaraǵandy oblystyq fılıalynyń dırektory Qanat Shaımın.

Qanat Shaımın habarlaǵandaı, bıyl sondaı-aq «Jezqazǵan - Qaraǵandy» tas jolynyń kópten kútilgen jóndeý jumystaryna qarjy tabylǵan. «Jezqazǵan - Qyzylorda» kúre jolynda ótken jyly bastalǵan jóndeý jumystary jalǵasýda. Al «Aqtaý-Bastaý-Temirtaý» trassasynda kúrdeli jóndeý aǵymdaǵy jyldyń qarashasynda aıaqtalady dep kútilýde.