«Qazaqstan» telearnasy memlekettik tildiń qoldaný aıasyn keńeıtýde ózge BAQ-qa úlgi bolady. Bul týraly búgin QR Aqparat jáne komýnıkasıalar mınıstrligi janyndaǵy qoǵamdyq keńes otyrysynda «Qazaqstan» teleradıokorporasıasy basqarmasynyń tóraǵasy Erlan Qarın bildirdi, dep habarlaıdy Qamshy.kz aqparat agenttigi QazAqparatqa silteme jasap.
«Qazaqstan» teleradıokorporasıasy teleradıoaýdıtorıanyń suranysyna, talaptaryna sáıkes óz medıaktıvterinde memlekettik tildiń qoldaný aıasynyń keńeıtý saıasatyn júrgizýde. Biz basqa da BAQ ókilderine osy baǵyt boıynsha úlgi bola alamyz degen oıdamyz. BAQ salasyndaǵy memlekettik tildiń damýyna yqpal etetin taǵy bir faktor - zertteýshi kompanıalardyń ólsheýleriniń sapasynda. Alaıda olardyń júrgizetin ólsheý-zertteýleri kórermenderdiń teledıdar kórý reıtıńin obektıvti jetkizbeıdi. Mysaly «TNS Central Asia» kompanıasy turǵyndary 100 myńnan asatyn qalalar boıynsha, zertteýdi tek 2200 tirkelgen abonenttermen júrgizgen. Olardyń aıtýynsha, suralǵan respondentterdiń 58 paıyzy qazaq tildi. Alaıda ol respondentterdiń Astana jáne Almaty qalalarynda, basqa da ortalyqtandyrylǵan iri qalalarda ornalasqandyqtaryn eskerý qajet. Al qazaq tildi aýdıtorıanyń basym bóligi iri qalalarda emes, qala shetinde, aýyldy eldi mekenderde turady. Sondyqtan, olardyń talǵamdary eskerilmeı qalady», - dedi Erlan Qarın.
Sol sebepti ol kompanıa usynǵan ólshemder naqty jaǵdaıdy eskermeıtindigin basa aıtty. Mysaly, joǵaryda aıtylǵan kompanıa ótken aptanyń úsh kúninde (sársenbi, beısenbi, juma) 60 paıyz kórsetkishti tek «1-arna» men «KTK» telearnalarynyń úlesine bergen.
«Sondyqtan, telekórýdiń ólshemderiniń sapasyn joǵarylatý úshin, reıtıńti ólsheýdiń basqa da balamalyq joldaryn qoldaný kerek. Baǵdarlamalardyń tanymaldylyǵy jaıyndaǵy aqparatty bilý úshin balamaly zertteý joldaryn qoldanysqa engizý qajet. Mysaly, saýalnama, blıs-ıntervú, áleýmettik zertteýler, fokýs grýppalardyń zertteýlerin, onlaın rejimdegi ınteraktıv sıaqty joldardy sapaly ári naqty, shynaıy nátıje úshin qoldaný kerek. Medıa ólshemderdiń balamaly júıesin qoldaný, bizge jańa baǵdarlamalar ashý, baǵdarlamalardyń qurylymy, quramy, efırlik setkanyń qurastyrylýy jóninde durys sheshim qabyldaýǵa kómektesedi. Odan bólek, obektıvti statısıkany qurý úshin, quzyretti organdarmen birge ólsheý metodologıasynyń jetildirý jumystaryn júrgizý kerek. Bul isti júzege asyrý úshin, «TNS Central Asia» kompanıasymen, telearnalarmen, statısıka agenttigimen jáne basqa da múddeli uıymdarmen jumysty júıeleý kerek», - dedi «Qazaqstan» teleradıokorporasıasynyń basshysy.
