QR ulttyq ekonomıka mınıstri Tımýr Súleımenov jyl basynan beri respýblıkada ınflásıalyq úderisterdiń baıaýlaǵany baıqalǵanyn baıandady. Bıyl qyrkúıek aıynda ınflásıa 0,3%, al jalpy jyldyń basynan beri — 4,2%-dy qurady. Baıaýlaýdyń negizgi faktorlary valútalyq naryqtaǵy jaǵdaıdyń turaqtanýy, naryqtyń birqalypty ınflásıalyq boljaldary, sondaı-aq azyq-túlik taýarlarynyń negizgi túrleri boıynsha ónimder shyǵarýdyń ósýi boldy. Osylaısha, azyq-túlik taýarlarynyń baǵalary sońǵy úsh aı qatarynan tómendeýde. Oǵan qosa, baǵalar men aqyly qyzmet kórsetýlerge tarıfter birqalypty qarqynmen ósýde.
Azyq-túlik taýarlary baǵalarynyń maýsymdyq tómendeýine qaramastan bıylǵy jyldyń basynan bastap pıaz, sábiz, qyzylsha, qoı eti jáne sıyr eti baǵalarynyń qos tańbaly ósimi baıqalǵan. Sonymen qatar, jumyrtqa, qaraqumyq, qyryqqabat, qant jáne kúnbaǵys maıy baǵasynyń eki tańbaly arzandaýy tirkelgen. Azyq-túliktik emes taýarlar boıynsha baǵalardyń eń kóp ósimi dızel otynyna, benzınge, suıyltylǵan gazǵa, matalarǵa, keńse taýarlaryna, aıaq kıim men qatty otynǵa qatysty bolyp otyr.
Atalǵan táýekelderdiń ornyn toltyrý úshin Úkimet áleýmettik mańyzy bar azyq-túlik taýarlaryna jáne qyzmet kórsetýlerge baǵalar men tarıfterdiń negizsiz ósýine jol bermeý sharalaryn qoldandy.
Osyǵan baılanysty óńirlerdiń ákimderine ASHM-men birge Óńirlik turaqtandyrý qorlarynda negizgi azyq-túlik taýalarynyń jetkilikti qoryn qamtamasyz etý qajet. Sondaı-aq, kún saıyn baǵalarǵa monıtorıń jasaý jáne naryqta qajetti áleýmettik mańyzy bar azyq-túlik taýarlarynyń jetispeýshiligi men molyǵýyna jol bermeý úshin turaqtandyrý qorlarynyń resýrstaryn tıimdi paıdalaný kerek.
Energetıka mınıstrligine óńirlerdiń ákimderimen birge jylý berý maýsymynda janar-jaǵarmaı materıaldaryna baǵalardyń negizsiz ósýine jol bermeý úshin sáıkes jumys júrgizý qajet.
Joǵaryda atalǵan aldyn alý sharalaryn eskergende 2017 jyldyń qorytyndysy boıynsha ınflásıa deńgeıi 6,9-7,5% aýqymynda bolady dep kútilýde, bul josparlanǵan deńgeıge sáıkes keledi.
