Ońtústik Qazaqstan oblysynda jylytý maýsymynda gazben ýlanýdyń 24 oqıǵasy tirkelgen. Saldarynan ıis tıgen 46 adam zardap shegip, 11-i kóz jumdy. Bul týraly búgin Óńirlik komýnıkasıalar qyzmetinde brıfıń ótkizgen tótenshe jaǵdaılar qyzmetkerleri málim etti, dep habarlaıdy Qamshy.kz aqparat agenttigi.
Sala mamandarynyń sózinshe, gazben ýlanǵan jaǵdaılardyń basym kópshiligi uıqyǵa bas qoıǵan kezde, al tirkelgen 24 oqıǵanyń ishinde 21-i jeke turǵyn úıde, 3-eýi kópqabatty úı men qoǵamdyq monshada bolǵan. Turǵyndar peshterge jaramsyz jabdyqtardy paıdalanyp, óz betterinshe ornalastyrýy osyndaı qaıǵyly jaǵdaılarǵa soqtyrdy.
Sonymen qatar turmystyq gaz qurylǵylaryn paıdalaný kezinde órt qaýipsizdik qaǵıdalarynyń buzylýy da ıistenýge sebep bolypty.
«Oblys boıynsha jylytý maýsymy 2017 jylǵy 15 qazanda bastalady. Departament jylytý maýsymynda oryn alǵan keleńsiz oqıǵalardyń qaıtalanýynyń aldyn alý boıynsha is-sharalardy bastap ketti. Qyrkúıek aıynan bastap jylytý maýsymyna daıyndyq jumystary júrgizilýde. Turǵyn úı sektorlarynda úgit-nasıhat jumystaryn júrgizý úshin «Órt sóndirý jáne avarıalyq-qutqarý jumystary qyzmeti» MM-siniń qyzmetten bos jeke quramy tolyq jumyldyrylǵan. Polısıa qyzmetkerlerimen birlesip, áleýmettik qaýip-qater tobyna jatatyn zeınetkerler, kóp balaly, turmysy nashar otbasylar, áleýmettik beıimdelmegen azamattardyń ómir súretin oryndarynda 27 reıd ótkizildi»,- deıdi oblystyq TJD órt qaýipsizdigi salasyndaǵy baqylaý jáne profılaktıkalyq qyzmet basqarmasy bastyǵynyń orynbasary Baýyrjan İzbasarov.
Tótenshe jaǵdaı qyzmetkerleri tipti túsindirý jumystaryn júrgizýge jergilikti dinı birlestikter de tartylǵanyn aıtady. Memlekettik órt baqylaý ınspektorlary juma namazdan keıin jınalǵan qaýymǵa turǵyn úı sektorlarynda órt qaýipsizdigin saqtaý týraly túsindirme jumystaryn ótkizip jatqanyn sóz etti.
