Qazaqstan Respýblıkasy men Birikken Arab Ámirlikteri arasyndaǵy dıplomatıalyq qarym-qatynastardyń ornaǵanyna 25 jyl tolýy aıasynda QR Din isteri jáne azamattyq qoǵam mınıstri Nurlan Ermekbaev Birikken Arab Ámirlikteriniń Qazaqstandaǵy Elshisi Mohammad Ahmad Sýltan Essa Aldjabermen, ekstremızmge qarsy «Hedaıa» Halyqaralyq ortalyǵynyń atqarýshy dırektory Maksýd Krýzben jáne «Saýab» ortalyǵynyń ókili Olaıa az-Zahırımen kezdesti dep habarlaıdy Qamshy.kz aqparat agenttigi.

Kezdesýge qatysýshylar Qazaqstanda «Hedaıa» ortalyǵynyń óńirlik keńsesin ashý úshin atalǵan uıymdy Ádilet mınıstrligine tirkeýge qoıýǵa qatysty  uıymdastyrýshylyq baǵyttaǵy máselelerdi talqylady. 

Kezdesý barysynda «Hedaıa»  jáne «Saýab» ortalyqtary qyzmetiniń  tanystyrylymy ótkizildi. «Hedaıa» halyqaralyq ortalyǵy 2012 jylǵy jeltoqsan aıynda Birikken Arab Ámirlikteriniń bastamasymen qurylǵan. Uıymnyń negizgi mısıasy - zorlyq-zombylyqty ekstremızmge qarsy úzdik saraptamalyq zertteýlerdi júrgizý jáne taratý arqyly ekstremızmdi joıýǵa birlesip áreket etý bolyp tabylady.

«Hedaıa» halyqaralyq ortalyǵynyń qyzmetimen tanystyrý barysynda atalǵan ortalyqtyń atqarýshy dırektory Maksýd Krýz ekstremızm men terorızmge qarsy is-qımyl salasyndaǵy sarapshylardyń arasynda aqparat almasýdyń jáne tikeleı baılanystar ornatýdyń mańyzdylyǵyn atap ótti.

Al, «Saýab» ortalyǵynyń ókili Olaıa az-Zahırı kórneki aqparattyq-grafıkalyq materıaldardyń negizinde DAISH lańkestik uıymynyń ıdeologıalaryn ınternet pen áleýmettik jelilerde taratýǵa qarsy turý maqsatynda Ortalyqtyń atqaryp otyrǵan jumysynyń negizgi tetikteri men nátıjelerin túsindirdi.

Kezdesý qorytyndysy boıynsha taraptar dinı ekstremızm men terorızmniń aldyn alý salasyndaǵy yntymaqtastyq pen tájirıbe almasý perspektıvalary týraly pikir almasty.

Atalǵan sharaǵa sondaı-aq, QR Syrtqy ister mınıstrliginiń, quqyq qorǵaý jáne arnaıy organdardyń, Mádenıetter men dinder Halyqaralyq ortalyǵynyń, «Aqnıet» QQ-nyń, «Terorızmge qarsy komıtet» RQB-nyń jáne «Kazdream technologies» analıtıkalyq ortalyǵynyń ókilderi de qatysty.