Qaraǵandy oblysynyń  turǵyny óziniń 13 jyl buryn seksýaldy quldyqta bolǵanyn aıtyp aryz jazǵan edi. Alaıda is aıaǵyna jetpeı toqtatyldy, dep habarlaıdy Qamshy.kz aqparat agenttigi 31 arnaǵa silteme jasaı otyryp.

Jábirlenýshi týystarymen aralaspaıdy. Turatyn baspanasy joq. Ýaıymnan densaýalyǵy da syr bergen.

Áıel ázer degende quldyq qamyttan qashyp qutylypty. Ol ózin zorlaǵan adamnan qyz da týyp alǵan. Qazir qyzy óz ákesinen aýmaı ósip kele jatyr. Qazir 36 jastaǵy kelinshektiń 19 jyly qorqynysh, yzamen ótken.

“İshimde bári qaınap jatyr. Túsindirip aıta almaımyn. Meniń ómirimdi qurtqany úshin ishimde qaınaǵan kek bar”, – deıdi Qarlyǵash.

Oqıǵa 1998 jyly bastalǵan. 17 jastaǵy Qarlyǵash Qaraǵandy pedagogıkalyq kolejine túsedi. Alaıda stýdent bolyp úlgere almaǵan. Ony er adam urlap áketip, dalada zorlap, sosyn Kýrchatov qalasynyń mańyndaǵy aýylǵa alyp ketedi. Belgili bolǵandaı muny urlaǵan er adam sharýa qojalyǵynyń basshysy, jergilikti bedeldi adam eken.

“Aıaǵyma jasyl granata baılap, ony esikke bekitip qoıady. Sosyn “bireý ashatyn bolsa, granata jarylady” deıdi. Sol kúıi meni tastap shyǵyp ketken kezderi de bolǵan. Ádeıi me, álde umytty ma bilmeımin. Al men bir kún boıy sol granataǵa tańylyp otyrdym,” – deıdi ol.

Qarlyǵash Omarhanova jetim bolǵandyqtan, ony eshkim izdeı qoımapty. Keıin jalǵyz ápkesi ótinishin polısıanyń qabyldamaı qoıǵanyn aıtypty. Ol quldyqta bolǵan bes jyl ishinde ol úıde basqa qyzdar da paıda bolypty. Biraq, olar keıinirek qashyp ketken. Al Qarlyǵashtyń bosaýyna sol jerdegi jumysshy kómektesipti. Áıel keıin baryp óziniń júkti ekenin bilgen. Qyzyn bosanyp, biraq ápkesine barmaǵan.

“Men eger Qarqaralyǵa barsam, meni tiri qaldyrmas edi”, – deıdi áıel.

Sodan beri de 13 jyl ótken. Kúıeýge shyqpaǵan Qarlyǵash aýrýhanada sanıtarlyq qyzmetker bolyp isteıdi. Erkekterden ábden qorqyp qalǵan. Internatta oqıtyn qyzynyń jyl sanap ákesine uqsap bara jatqany da áıeldiń janyn jegideı jegen. Aqyry, oılana kele “Mır dobra” daǵdarys ortalyǵyna kelipti.

“Ortalyqtyń áleýmettik-psıhologıalyq beıimdeý jumystary aıasynda biz oǵan kómektesemiz. Qazir onymen psıhologtar, psıhıatrlar jumys istep jatyr”, – dedi uıymnyń jetekshisi Tatána Abramenko.

Sondaı-aq, áıeldiń túsirgen shaǵymyna sáıkes polısıa qazirgi tańda birneshe bap boıynsha qylmystyq is qozǵap úlgerdi.

“Aýyr qylmys úshin bul ýaqyt 10 jylmen teń. Erekshe aýyr qylmys – 20 jyl. Meniń túsingenim boıynsha bul isti qozǵaýǵa ábden bolady”, – deıdi Adam quqyqtary jónindegi halyqaralyq búro fılıalynyń dırektory Iýrıı Gýsakov.

Al Qarlyǵash qyzdyń bul jaǵdaılardan beıhabar.