Jezqazǵan qalasynda Ketbuqa eskertkishi resmı ashyldy, dep habarlaıdy Qamshy.kz aqparat agenttigi.

Ashylý saltanatyna Qaraǵandy oblysynyń ákimi Erlan Qoshanov, Memleket qaıratkeri, Qazaqstannyń Halyq Qaharmany Muhtar Altynbaev, kórnekti qoǵam qaıratkerleri, shyǵarmashylyq zıaly qaýym ókilderi qatysty.

Shyńǵys han zamanynyń yqpaldy tulǵasy, ataqty jyraý, kemeńger bı, erjúrek qolbasshy Ketbuqa babanyń el tarıhynda alar ornyn erekshe aıtýǵa bolady. 

Álemdik deńgeıde Ketbuqa búkil Iran men Kishi Azıaǵa ústemdik júrgizgen, Ierýsalımge joryqqa attanǵan Hýlaǵý hanzadanyń saıası keńesshisi jáne áskerbasy bolǵan. Arab tarıhshylarynyń eńbekterinen Ketbuǵa noıannyń erlikteri týraly birshama tyń derekter tabylypty. Parsy eli men Shamdy jaýlap, ózine qaratqan Shyńǵys hannyń nemeresi Hýlaǵý hannyń Sham elindegi orynbasary Ketbuǵa noıan bolǵany týraly da jazylǵan. Osylaısha álemge aty jetken dana jyraý Ulytaýda uıysqan qazaqtyń baǵanaly sıaqty bir atasynyń túp qazyǵy ekeni aı-qyndalyp otyr. 

El bolyp atqarǵan eleýli istiń arqasynda qalanyń kórikti baqjolynyń bas jaǵynan tarıhı tulǵanyń at ústindegi qoladan quıylǵan eńseli eskertkishi boı túzedi. Granıtpen qaptalǵan tuǵyrymen qosa eseptegende eskertkishtiń bıiktigi — 10,5 metr. At ústindegi jyraýdyń eskertkishi Oktábr Sekemanovtyń jetekshiligimen Astanada jasaldy. Músinshi mamandary — Asqar Nartov pen Serik Rústembekov. Eskertkishi, tuǵyry jáne barlyq jumystary 81 mln. teńgege jasalǵan bul ıgi istiń qarjylaı salmaǵyn «Qazaqmys» korporasıasy men ondaǵy ult múddesine janashyr azamattardyń kóterdi. Ketbuqanyń máńgilik tynys tapqan jerinen ákelingen topyraqty baba tabany tıgen óńir qoınaýyna berý rásimi Joshy han kesenesinde ótkizilip, quran baǵyshtaldy.