Respýblıkalyq akademıalyq Nemis teatry, «Astana Musical» teatry, «Astana sazy» etno-folklorlyq ansambli venalyq MuTh-de óner kórsetti dep habarlaıdy Qamshy.kz aqparat agenttigi. 

Shyǵarmashylyq ujym óziniń mádenı mindetin úlken jetistikpen atqaryp, Qazaqstannyń ulttyq óneriniń úzdik úlgilerin álemge tanytty. «Rýhanı jańǵyrý» baǵdarlamasynyń aıasynda Qazaqstan Respýblıkasynyń Mádenıet jáne sport mınıstrligi uıymdastyrǵan «Uly Dala Teatry» gastróldik saparmen Parıj, Berlın, Belgıa, Vena jáne Máskeýge bardy. Teatr ujymy gastróldik sapar barysynda Eýropanyń ár qalasynyń sahnasynda teatr tanýshylar, synshylar, Elshilik ókilderiniń qatysýymen kórermenderge ónerlerin pash etti.

Qazaqstannyń shyǵarmashylyq ujymy qazaq jáne álem jaýharlary bolyp sanalatyn úzdik mýzykalyq shyǵarmalardy tanytty. Bul «Astana sazy» etno-folklorlyq ansambliniń súıemeldeýimen «Astana Musical» teatrynyń «Qyz Jibek» qoıylymy, Nemis teatrynyń qoıylymyndaǵy «Qaragóz» týyndysy.

«Rýhanı jańǵyrý» baǵdarlamasy aıasyndaǵy ımıjdik joba biz úshin óte mańyzdy. Bizdiń teatrǵa Qazaqstanda halyqaralyq deńgeıdegi teatr ujymdary, ulttyq draatýrgıa bar ekendigin kórsetý múmkindigi berilip otyr. Bizdi jyly qabyldap, ónerimizge joǵary baǵa bergen Eýropa kórermeni erekshe qýantady», - dep atap ótti Nemis teatrynyń jetekshisi Natalá Dýbs.

Sulý Qaragózdiń daryndy Syrym aqynǵa mahabbaty týraly ańyz Natalá Dýbs sıaqty talantty rejıserdiń qoılymy arqyly jańa tartymdy sıpatqa ıe boldy. Ol BUU-nyń alty tilderiniń biri nemis tilinde alǵash ret jaryqqa shyqty. Biregeı týyndynyń kórkemdigi men tereńdigin tanymal berlın horeografy Florıana Bılbaonyń daıyndaǵan bıi jandandyra túsedi. Spektáklge án jazǵan Germanıa kompozıtory Iayrope. Synshylardyń pikiri boıynsha «Qaragózdiń» jańa qoıylymy klasıka janryn súıetin kórermen men jalpy ónerdi baǵalaıtyn jurtshylyqqa erekshe áser etti.

«Qazaq dramatýrgıasynyń jarqyn týyndylarynyń biri emosıalyq sátterge toly. Eski salt-dástúrge boı usynǵan bir-birin súıetin eki ǵashyq bólek ómir súrýde. Qazaqstandyq sahna úshin janr túri erekshe. Qazaqstanda tek orys, qazaq emes, nemis jáne basqa da tilderde spektákl kórý múmkindigi bar ekendigi qýantady», - dep atap ótti kórermen, tanymal ınstablogger Anel Noıbaýer.

Jas qazaq teatry Vena turǵyndaryna dala teatr elementteri bar etno-folklorlyq múzıkl «Qyz Jibek» qoıylymyn syılady. «Qyz Jibek» – qazaq fólklorynyń injý-marjany. Súıispenshiliktiń ánurany bolyp tabylatyn týyndy – halyqtyń poezıalyq murasynyń barlyq saltanatty ulylyǵyn sińirgen.

El birligi men tutastyǵy ıdeıasy qatar órilip, halyqtyń oı-armany men ańsary tanylatyn, boıaýy jarqyn qoıylymda ulttyń ómiri men tyǵyz baılanysty dástúrler de  - bata sóz, qarǵys, joqtaý, zar, kóńil aıtý, qoshtasý jáne t.b. – jaqsy kórinis tapqan.

Kórermenderdiń aıtýy boıynsha, qoıylymnyń ulttyq názik hosh ıisi birden seziledi, qazaq mádenıetin aıryqsha erekshelikterimen aıshyqtaıdy.

Muth venalyq teatrynyń dırektory Otto Djankovıch «Qyz Jibek» spektakli qazaqstandyq jas teatrdyń sózsiz jetistigi ekendigin atap ótti. Oǵan adam toly zal, kórermenderdiń shynaıy ystyq yqylasy tolyq dálel. «Spektákl qazaq tilinde boldy. Alaıda aýdarma kerek bolmady, óıtkeni men júregimmen túsindim. Ártister men komandanyń kásibıligine tánti boldym», - dep oıyn qorytyndylady ol.

Ǵasyrlar qoınaýynan syr shertetin «Qyz Jibek» qazaqtyń lıro-epostyq jyrynyń jaýhary. Tragedıa keıipkerleri Jibek pen Tólegen álemge áıgili Romeo men Djýlettadaı qazaq halqy úshin mahabbattyń sımvoly ispettes. Oqıǵalar negizinen jas batyr Tólegen, Qyz Jibek jáne el arasynda erjúrektigimen, kúsh-qaıratymen aty shyqqan batyr Bekejan arasyndaǵy qarym-qatynastar tóńireginde órbıdi de, aqyry Tólegen qyzǵanyshtyń qurbany bolady.

«Qazaqstan Respýblıkasynyń Mádenıet jáne sport mınıstrligi júzege asyryp otyrǵan «Jahandyq álemdegi zamanaýı qazaqstandyq mádenıet» jobasy qazaqstandyq shyǵarmashylyq jobalar men qazaqstandyq ujymdardyń jańa ıdeıalaryna tyń serpin beredi dep oılaımyn. Bul óz múmkindikterimizdi joǵary deńgeıge kóterý jáne álemge ulttyq mádenıettiń jetistikterin kórsetý úshin tamasha múmkindik», – deıdi «Astana Musical» teatrynyń kórkemdik jetekshisi Asqat Maemırov.

«Alǵashqy kórinisten bastap-aq meni úlken qýanysh kernedi. Qazaqstandaǵy ómirimdi, teatrdaǵy jumysym esime tústi. «Kózimniń qarasyn» spektákl sońynda ártistermen birge aıttym. Keremet quram, tamasha oıyn. Eki jyl ishinde jastardyń bir-birin tanyp, birge jumys istep ketkendigine tamsandym. «Astana múzıkl» teatryna keremet týyndyny osyndaı deńgeıde oınap usynǵandaryńa alǵysym sheksiz» - deıdi Vena qalasy sımfonıalyq orkestriniń mýzykanty  Marıa Orınınskaıa.

«Qyz Jibek» keıipkerleri arqyly biz Eýropada tanylǵan Romeo men Djýlettany kóremiz. Jibektiń beınesi halyqtyń júreginde saqtalǵan sulýlyq, mahabbat pen adaldyqtyń jarqyn beınesi. «Qyz Jibek» ańyzy zamanaýı qazaq qoǵamynyń ortaq murasy bolyp tabylatyn ǵasyrlyq rýhanı jáne adamgershilik qundylyqtardy beıneleıdi.