Jyl sanap memleket qoldaýynyń arqasynda elimizdiń óndirisi órkendep, ekonomıkanyń qýattylyǵy arta túsýde. Kúni keshe ındýstrıalandyrý kúnine arnalǵan jalpyulttyq telekópirde áleýmettiń áleýetin kóterýge kúsh salatyn taǵy júzge jýyq kásiporyndar men ónerkásip oryndary Elbasyna tanystyryldy. Onyń ishinde bizdiń óńir eki birdeı ınvestısıalyq jobany el nazaryna usyndy, dep habarlaıdy Qamshy.kz aqparat agenttigi taraztv.kz saıtyna silteme jasaı otyryp.
Elbasyna tanystyrylǵan Jambyl óńirindegi iri kásiporynnyń biri Moıynqumdaǵy granıt óndiretin «Orgstroı» kompanıasy. Japan túzge jan bitirgen kásipkerdiń bastamasymen iske qosylǵan zaýyt jylyna 800 myń sharshy metr granıt taqtasyn óndirýge qaýqarly. Óndiris ornynyń aıaqqa turyp, ary qaraı damýyna álbette memlekettiń qoldaýy serpin berdi. Jańa zaýyttyń jumysyn Elbasyna kásiporyn dırektory Qalı Ǵylymhan tanystyrdy.
Qýatty kásiporyn munymen toqtap qalmaq emes. Óndiris kólemin arttyryp, odan ary órleýdi kózdeıdi. Buıyrsa, aldaǵy jyly taǵy 150 jańa jumys orny ashylmaq munda. Demek, aımaqta 150 adamǵa jumyssyzdar sany kemıdi degen sóz. Kıeli ólke qoınaýy qazynaǵa baı. Ony nege el ıgiligine jaratpasqa, deıdi kásipker.
"Halqyma, elime, Otanyma, táýelsiz, eńbek etsem dep armandaımyn. Eńbek etýge násip etse dep tileımin, qazaq halqyna, jalpy barlyq jumysshylaryma jaqsy jumys bersem deımin", - dep málimdedi «Orgstroı» kompanıasynyń dırektory Qalı Ǵylymhan.
Atalmysh kompanıanyń jumyskeri Erjan Súıinbaev: "Qazaqstanymyz áıgili bolyp, osyndaı tasymyz, osyndaı baılyǵymyz bar degenge maqtan etem. Búgingi telekópirimiz áserli boldy, Elbasynyń maqtanyshyn alyp, soǵan qýanyp turmyn", - dep aıtyp ótti.
Elbasyna jalpyulttyq telekópir arqyly tanystyrlǵan ekinshi nysan da naq osy Moıynqum aýdanyna tıesili. Kásiporyn Prezıdenttiń qazirgi kezde erekshe ekpin berip otyrǵan sıfrlyq basqarý júıesin taý-ken óndirisine alǵashqylardyń biri bolyp engizgen óndiris oshaǵy.
Aıta keteıik, «Jambyl» jyljymaly telestýdıasy osymen on besinshi ret respýblıka kóleminde tikeleı baılanysqa shyǵyp, Elbasymen bolǵan telekópir boıynsha sapaly habar taratyp otyr. Bul rette aýqymdy jobalardy Elbasyna tanystyrýda tynymsyz eńbek etip, el aldyna shyǵýyna óz úlesin qosqan «Jambyl» telearnasynyń ujymyna aımaq basshysy Kárim Kókirekbaev óz alǵysyn bildirdi.
Elimizdiń ındýstrıaldy-ınnovasıalyq damý memlekettik baǵdarlamasy aıasynda Jambyl oblysynda jalpy ınvestısıalar kólemi 159 mlrd tg bolatyn, 53 kásiporyn iske qosylsa, 6 200-ge jýyq jańa jumys orny ashylǵan. Óńirge ınvestısıalar tartý mańyzdy basymdyqtardyń biri bolyp qala bermek.
