Almaty qalasy Áýezov aýdanynda bos jumys oryndary men memlekettik qyzmetter jármeńkesi bolyp ótti, dep habarlaıdy Qamshy.kz aqparat agenttigi.
Atalmysh jármeńke 2017 jyldyń 12 jeltoqsanynda «Grand Park» oıyn-saýyq ortalyǵynda 10:00 – 18:00 aralyǵynda boldy.
Bul is-sharany Almaty qalasy boıynsha memlekettik qyzmet pen jemqorlyqqa qarsy departament basshylyǵy Áýezov aýdany ákimdigimen birlese otyryp uıymdastyrǵan bolatyn.
Jármeńkeniń negizgi maqsaty elektrondy memlekettik qyzmetti dáripteý men memlekettik qyzmetti usynýdyń reti men «elektrondy úkimet» portaly, «Azamattar arnalǵan úkimet» atty korporasıadan qyzmet alýdyń artyqshylyǵyn túsindirý.
Jármeńkege qatysqan árbir azamat kásibı deńgeıde keńes alyp, jergilikti atqarýshy organdardyń kómegine júginý múmkindigine ıe boldy.
Sonymen birge jármeńkege qatysqan árbir azamat ózine usynylǵan jumyspen tanysa alady. Jalpy aıtqanda, Almaty qalasy boıynsha, 48 memlekettik organ qyzmet kórsetse, jalpy qyzmet kórsetý sany 353-ke jetken.
Búgindikke memlekettik korporasıa arqyly jáne «elektrondy úkimet» arqyly jasalǵan qyzmet búkil memlekettik qyzmetterdiń 60 %-yn quraıdy.
Atalǵan jármeńkede 21 memlekettik organ, 4 úkimettik emes uıymdar, olardyń qatarynda Ulttyq kásipkerler palata «Atameken», «Damý», «Jılstroısberbank», «GFSS» arhıtektýra men densaýlyq saqtaý, bilim berý, azamattyqqa tirkelý jáne jer tilimine qatysty salalarǵa baılanysty qyzmet kórsetti.
Búgin jármeńkege 1684 adam memlekettik qyzmetke baılanysty túrli suraqtarmen kelse, bos jumys ornyna qatysty suraqtarmen kelgen 231 azamatqa qyzmet kórsetildi.
Kásibı deńgeıdegi keńes alý maqsatymen memlekettik organdarda aqparattyq vıdeo rolıkter men taratylatyn materıaldardaǵy aqparattar jetildirildi.
Jármeńkege qatysýshylarǵa elektrondy sandyq qoltańba alý múmkindigi usynylyp, bir ýaqytta birneshe elektrondy qyzmet túrleri tanystyryldy.
Al úıden shyqpaı óz betimen jumystaryn aıaqtap, ýaqytty únemdegisi kelgender úshin 15 mınýttyń ishinde elektrondy sandyq kiltti alý múmkindigi usynyldy.
Negizinen kópshilik azamattyq alýǵa baılanysty aqparattarǵa qyzyǵyp, osyǵan qatysty suraqtardy qoıdy. Sonymen birge jer telimine baılanysty suraqtar óte kóp boldy.
Atalǵan sharaǵa jergilikti BAQ ókilderi de qatysyp, ózderine qajetti saýaldarǵa jaýap taba aldy.
Aıta ketetin bolsaq, atalǵan jármeńke Almaty qalasyndaǵy basqa da aýdandarda ótetin bolady. Jaqyn arada Bostandyq aýdanynda aýdanynda dál osyndaı jármeńke ótedi dep josparlanyp otyr.
