1918 jyly sáýirde A.Baıtursynuly, M. Dýlatov, R. Mársekov qatarly Alashtyń arystary Sháýeshek qalasyna barǵan bolatyn. Áset aqynnyń qazirgi beınesi sol jolǵy  basqosýda toptyq túsken sýretten alynǵan...

Tarıhı derekten 

Ańyz bolǵan qazaqtyń dalasyna,

Máshhúr bolǵan Alashtyń balasyna –

Ahmet, Mirjaqyp pen Raıymjan...

Barǵan kezi Sháýeshek qalasyna.

Jel súıip jasyp tústi jeleginen,

Kúı tókti qaıyńy men tereginen.

Jas baqta basyn qosty kileń jaqsy,

Al, Ahań oı tolǵady tereńinen:

«Ot bastyq, qyzyl qolmen kúl kósedik,

Júrsińder, eı, aǵaıyn, kimge senip?!

Bereke, birligimiz jarasqanda,

Ózgeniń bodany bop júrmes edik.

Sábıdeı bulqynamyz jórgektegi,

Ár qazaq – bir-aq Alash jer-kóktegi.

Basyńda temir noqta, qaıys noqta,

Qaıran jurt,  mańdaıyńnan sor ketpedi!

Bótenge telim boldy en dalamyz,

Qul boldy elge tutqa  bel balamyz.

Eki qazaq birigip Otan bolmaı,

Aıý men aıdaharǵa jem bolamyz ...»

Ótkizgen ǵazız bastan san synaqty,

Er Ahań kópti solaı qamshylapty.

Kúıikten soqyr kózden jas shyǵypty,

Namystan ólmegen soń jan shydapty.

Teńgedeı bolǵanynsha temir etik,

Kúrsintip bara jatty  ómir ótip.

...Naımanbaıdyń Áseti án salypty,

Sol topty tebirentip, eńiretip.

Mezgilsiz baq qonbaıdy qur kútkenge,

...Saparda keledi áli ilbip pende.

Ásettiń, Ahańdardyń sherin qozǵar,

Shirkin-aı sol sýretke til bitkende.

Býsanyp Tarbaǵataı qyrqalary,

Sháýeshek  shaharyna nur tarady.

Myń toǵyz júz on segiz. Sáýir aıy –

Alashtyń tarıhynyń bir paraǵy.

Ǵalym QALIBEKULY,

Halyqaralyq «Alash» ádebı syılyǵynyń ıegeri