«Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Prezıdent Joldaýynyń ınovasıa salasyndaǵy mindetterin qalaı júzege asyrýǵa bolady? Osy saýalǵa qatysty «QazAqparat» HAA tilshisine Joldaýdyń atalǵan baǵyty boıynsha «G-Global «jasyl ekonomıka» men damý koalısıasy» ZTB basqarma tóraǵasy Saltanat Rahymbekova tushymdy jaýabyn berdi, dep habarlaıdy Qamshy.kz aqparat agenttigi.

«Tórtinshi ónerkásiptik revolúsıa «aqparattyq qoǵam», tolyqtaı ıntellektýaldyq ári qaldyqsyz óndiris, senimdi qajettilik, absolútti ári dáýirlik ınovasıalardy qurýdy kózdeıdi. Ol jaıly bizdiń Prezıdent «HHİ ǵasyrdaǵy jahandyq energoekologıalyq strategıa» kitabynda keńinen toqtalyp ótken bolatyn. Joldaýda «sapaǵa joǵary talap qoıa bilý, ǵımarattardyń ekologıasy men energıany únemdeýine» erekshe mańyz berý kerektigi aıtylady. «Jasyl» qurylystyń qaǵıdattary - tórtinshi ónerkásiptik revolúsıanyń taǵy bir basym tusy» - deıdi ol.

Onyń aıtýyna qaraǵanda, tórtinshi ónerkásiptik revolúsıany tereń zerttep, mektep qabyrǵasynan bastap balalar meńgeretindeı dárejede oqytý kerek. «Demek, JOO-lar men stýdenttik qalashyqtar, tehnoparkter, tórtinshi ónerkásiptik revolúsıa tehnologıalaryn keshendi túrde ıgerý alańyna aınalýy tıis», - deıdi ol.

Saltanat Rahymbekova Joldaýda atalyp ótkendeı, «barlyq óńirlerdegi oqýshylar saraıynda balalar tehnoparki men bıznes-ınkýbatorlardy salýdyń» mańyzyna toqtaldy. Onyń aıtýynsha, tehnologıalyq broker, avtomattandyrylǵan jylyjaılardy qamtamasyz etý sekildi mamandyqtardy meńgerýdiń mańyzy asa joǵary. Tórtinshi ónerkásiptik revolúsıanyń kóshbasshylary - EKSPO-2017 aýmaǵynda salynyp jatqan Halyqaralyq İT-startaptar tehnoparki men Jasyl tehnologıalardyń halyqaralyq ortalyǵy bola bilýi kerek.

Saltanat Rahymbekova sonymen birge, tyń tehnıkalyq negizde sıfrly, «vırtýaldy» ekonomıkany damytýdyń mańyzdy ekenin tilge tıek etti. «G-Global bazasynda tórtinshi ónerkásiptik tóńkeristiń ınovasıalary men «jasyl» jobalary úshin qarajat jınaıtyn kraýtfandıngti alań qurý kerek», - dep atap ótti ol.