Demokratıalyq kúshterdiń «Qazaqstan-2050» jalpyulttyq koalısıasynyń kezekti otyrysy Memleket basshysynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýyna arnaldy.

Jıynǵa eldegi jetekshi partıalardyń basshylary, Parlament depýtattary, Qazaqstan halqy Assambleıasy jáne birqatar qoǵamdyq uıymdardyń ókilderi qatysty.  Otyrysty ashqan «Nur Otan» partıasy Tóraǵasynyń Birinshi orynbasary Muhtar Qul-Muhammed Memleket basshysynyń jyl saıynǵy Joldaýyn el  ómirindegi basty oqıǵalardyń biri dep atap ótti, dep jazady Qamshy.kz aqparat agenttigi Qazaqparat málimetine súıenip. 

«Búkilhalyqtyq talqylaýǵa usynylyp otyrǵan Elbasynyń bıylǵy Joldaýyn osyǵan deıingi memlekettik, saıası, áleýmettik, ekonomıkalyq jáne rýhanı jańǵyrtýǵa baǵyttalǵan asa úlken bastamalardyń zańdy jalǵasy dep esepteımin. Jáne bul jolǵy Joldaý árbir qazaqstandyqqa, onyń ómirine, onyń densaýlyǵyna, ál-aýqatyna degen Elbasynyń naqty qamqorlyǵyn aıqyn kórsetip otyrǵan qujat. Sondyqtan sizder men bizderdiń endigi maqsatymyz osy Joldaýdyń árbir bastamasyn, mazmunyn barsha qazaqstandyqtarǵa jetkizý dep esepteımin», - dedi M. Qul-Muhammed Beıbitshilik jáne kelisim saraıynda ótken Demokratıalyq kúshterdiń «Qazaqstan-2050» jalpyulttyq koalısıasynyń otyrysynda.

Aıta keteıik, Demokratıalyq kúshterdiń «Qazaqstan-2050» jalpyulttyq koalısıasy «Nur Otan» partıasynyń bastamasymen quryldy. Ol 5 saıası partıanyń, 17 iri qoǵamdyq birlestiktiń jáne 500-den astam úkimettik emes uıymdardyń basyn biriktiredi.