Astanada Ulttyq ulan jaýyngerleri qudyqqa túsip ketken áıeldi qutqardy, dep habarlaıdy Qamshy.kz aqparat agenttigi.
Oqıǵa 10 qańtarda keshki 19.30 shamasynda oryn alǵan. Ulttyq ulannyń 5573 áskerı bóliminiń eki áskerı qyzmetshisi qyzmetten keıin úıge bara jatyp tosyn jaǵdaıǵa kýá bolady. Qorǵaljyn tas jolynda kele jatqan Maqsat Amanqul men Jomart Jeksembaev jol boıynda kele jatqan áıel kisiniń kenetten shuńqyrǵa qulap ketkenin baıqap qalady. Dereý kólikti toqtatyp, túsken boıda kómekke júgiredi.
Sham jaǵyp qarasaq, qudyqtyń tereńdigi 3-4 metrdeı eken. Jomart dereý kólikten arqan ákeldi. Belime baılap tómenge tústim. Bizdi baıqaǵan kisiler de taǵy bir jip alyp kómekke kelip jatty. Olardan dereý jedel járdem shaqyrýyn ótindik. Ekinshi arqannyń kómegimen apaıdy birinshi joǵaryǵa shyǵaryp jiberdim. Elýler shamasyndaǵy kisi eken, ústi malmandaı sý bolypty. Otbasy, baýyryna da habarlasyp aıttyq, - deıdi efreıtor Maqsat Amanqul.
Esterińizge sala keteıik, sol kúni Qazaqstan Respýblıkasy Ulttyq ulanynyń qurylǵanyna 26 jyl tolǵan bolatyn. Kásibı merekede, qyzmetten tys ýaqytta qala turǵynyna qorǵan bola bilgen eki jaýynger atalmysh áskerı bólimde eki jyldan asa ýaqyt qyzmet etip keledi.
İnisiniń aıtýy boıynsha, Aqqoıan Tólepbergenovanyń densaýlyǵy durys. Medısınalyq tekseris nátıjesinde onyń aýyr jaraqat almaǵany anyqtaldy. Tek tereńdikke qulaǵannan denesiniń ár tusyna qan uıyp qalǵan. «Telefonym sýdan istemeı qalypty. Kómekke kimdi, qalaı shaqyrar edim? Qutqaryp úlgerýshi me edi... Ony oılaýdyń ózi qorqynyshty. Sarbazdarǵa kóp rahmet! Joldary ashyq bolsyn dep batamdy berem, bar jaqsylyqty tileımin», - deıdi Aqqoıan Oljabaıqyzy der kezinde qajetti jerden tabylǵan ulandyqtarǵa alǵysyn jaýdyryp.
