Qytaıdyń Sýdjoý qalasynda 19 jastaǵy qazaqstandyq stýdent qyz 14-inshi qabattan qulap, qaza boldy, dep habarlaıdy Qamshy.kz aqparat agenttigi QazAqparatqa silteme jasaı otyryp. Qaıǵyly jaǵdaıdy QR SİM baspasóz qyzmetiniń basshysy Ánýar Jaınaqov rastady.  

«Qazir bul derek boıynsha Qytaı polısıasy tergeý júrgizip jatyr. Pákistannyń eki azamaty ustaldy. Keıinirek olardyń bireýi qolhatpen bosatyldy. Qaıǵyly jaǵdaı týraly Shanhaı qalasyndaǵy Qazaqstan Konsýldyǵy anyqtap bildi. Olar qyzdyń týǵan-týystaryna habar berdi. Konsýldyq qyzmetkerleri qyzdyń ata-anasyna Qytaıdan qorǵaýshy tabýǵa qol ushyn berdi», - dedi Ánýar Jaınaqov.

Oqıǵa 1 jeltoqsan kúni Shanhaı qalasynan 100 shaqyrym jerde ornalasqan Sýdjoý qalasynda boldy. 1999 jyly Almaty oblysynda týǵan stýdent qyz Sýdjoý qalasyndaǵy ýnıversıtetterdiń birinde 2-kýrsta oqyp júrgen.

Aldyn ala málimet boıynsha, 1 jeltoqsan kúni Pákistan azamaty qazaqstandyq boıjetken men onyń qurbysyn óz týǵan kúnin atap ótýge shaqyrǵan.

Páterde QR-dyń eki azamatshasynan bólek, taǵy bir pákistandyq bolǵan. Er adamdar ishimdik iship, qyzdarǵa qol jumsaı bastaǵan soń, olardyń biri páterdiń bir bólmesine qashyp kirip, esikti ishten jaýyp alǵan. Birshama ýaqyttan soń bólmeden shyqqan qyz qurbysynyń 14-inshi qabattan qulap ketkenin kórgen.

QR SİM baspasóz qyzmeti basshysynyń aıtýynsha, ázirge qyzdyń ózi sekirip ketkeni, bolmasa bireýdiń ıterip jibergeni naqtylanǵan joq. Degenmen, sot-medısınalyq saraptamanyń nátıjesinde qyzdyń bıiktikten qulaý saldarynan kóz jumǵany rastaldy.

Saraptama sondaı-aq onyń denesinde zorlyq-zombylyq belgileri bolmaǵanyn kórsetken. «Shanhaıdaǵy Qazaqstan Konsýldyǵy men QHR-daǵy Qazaqstan elshiligi bul máseleni óziniń tikeleı baqylaýyna aldy. Marqumnyń denesi 25 jeltoqsanda Qazaqstanǵa jetkizildi. Oǵan QR elshiligi barynsha kómek kórsetti», - dep atap ótti Á.Jaınaqov. Resmı ókildiń habarlaýynsha, mert bolǵan qyzdyń qurbysy Sýdjoýdaǵy oqýyn jalǵastyrýda.