QR Syrtqy ister mınıstrliginiń ókilderi Qytaıda qaıtys bolǵan 18 jastaǵy qyzdy zorlaý faktisi rastalmaǵanyn málim etti, dep habarlaıdy Qamshy.kz aqparat agenttigi QazAqparatqa silteme jasaı otyryp.

«Qyz zorlaý faktisi rastalmady, alaıda zorlyq kórsetýge degen umtylys bolǵan. Sot-medısınalyq saraptamanyń qorytyndysy boıynsha, qyz qulaýdyń saldarynan mert bolǵan»,- dep habarlady QR SİM-niń baspasóz hatshysy Ánýar Jaınaqov.

Vedomstvo ókilderi sonymen qatar Qytaıda 18 jastaǵy qyzdyń 14 qabattan qulaǵan kezinde qasynda bolǵan eki Pákistan azamaty da ustalǵanyn aıtty.

«Osy oqıǵadan keıin Qytaı polısıasy tergeýdi bastady. Pákistannyń eki azamaty ustaldy. Aldyn ala málimetterge sáıkes olardyń jasy 26-30 aralyǵynda. Olardyń stýdent bolǵan-bolmaǵany ázirge belgisiz. Olardyń biri qamaýda otyr, al ekinshisine tergeý aıaqtalmaıynsha eshqaıda ketpeý bultartpaý sharasy qoldanyldy. Tergeý júrip jatyr. Ekinshi qyz oqıǵaǵa qatysty túsinikteme bergen, qazir ol oqýyn jalǵastyrýda», - dedi Jaınaqov.

SİM ókili Qazaqstannyń Shanhaıdaǵy Bas konsýldyǵynyń erekshe qadaǵalaýynda ekendigin aıtady. Dıplomatıalyq vedomstvonyń málimetinshe, 1 jeltoqsan kúni Sýdjoý ýnıversıtetteriniń birinde oqıtyn on segiz jastaǵy qazaqstandyq stýdent qyz qurbysymen birge tanysy Pákistan azamatyna qonaqqa barady. Ol jerde onyń dosy da bolǵan. Bir kezde mas kúıde olar qyzdarǵa jarmasa bastaıdy. Qyzdyń bireýi jasyrynyp qalady, al ekinshi qyz 14-qabattan qulap, mert bolǵan.