Aǵymdaǵy apta aıtýly oqıǵalarǵa toly boldy. Endeshe, aptany qorytyndylap kórelik.
Bıliktegiler ne deıdi?
Áıelderdiń jasy er adamdardyń jas mólsherinen kem bolýy qajettiligine qaramastan, áıelderdiń zeınetaqy qory er adamdarǵa qaraǵanda kóbirek bolýy qajettiligi habarlandy. Zeınetaqy qoryndaǵy jınalǵan qarajattyń jetkilikti deńgeıiniń artýy áıelderdiń eń tómengi zeınetaqysy men zeınetkerlik jasynyń ulǵaıýymen baılanysty. 2018 jyldyń 1 qańtarynan bastap eń tómengi zeınetaqy 33 myń 745 teńge bolatyny aıtyldy.
***
2001 jyly týǵan 6000-ǵa jýyqtaı jasóspirim Almaty qalasynyń jergilikti áskerı basqarý organdarynyń áskerı esebine alynýy kózdelip otyr. Azamattardy áskerge shaqyrý ýchaskelerine tirkeý – bul áskerge shaqyrý jasyna deıingilerdi áskerı esepke qoıý úshin jergilikti áskerı basqarý organdarymen birlesip, tıisti jergilikti atqarýshy organdar júrgizetin áskerı esepke alý is-sharalary bolyp tabylady.
***
9 qańtarda Elbasy Qazaqstan halqyna mańyzdy málimdeme jasady jáne AQSH-tyń Qazaqstan Respýblıkasyndaǵy Tótenshe jáne ókiletti elshisi Djordj Krolmen kezdesý ótkizdi.
«Astana EKSPO-2017» kompanıasynyń jańa basshysy bolyp Erbol Shormanov taǵaıyndaldy.
***
10 qańtarda QR Prezıdenti Nursultan Nazarbaevtyń Qazaqstan halqyna joldaýy jarıalandy. Joldaýda úsh tildi meńgergen kez kelgen etnıkalyq toptyń ókili Prezıdent bola alatyny aıtyldy.
2018 jyly zeınetaqy men járdemaqynyń jáne muǵalimder jalaqysynyń neshe paıyzǵa ósetinin habarlady.
Qazaqstan Prezıdenti Nursultan Nazarbaev Aqordada birqatar shetel Elshisinen senim gramotasyn qabyldady. Atap aıtqanda, Shved Koróldiginiń Elshisi Mats Foıer, Kýba Respýblıkasynyń Elshisi Emılıo Pevıda Pýpo, Úndistan Respýblıkasynyń Elshisi Prabhat Kýmar, Ulybrıtanıa jáne Soltústik Irlandıa eliniń Elshisi Maıkl Djon Gıfford QR Prezıdentine senim gramotasyn tabystady.
Qazaqstan Prezıdenti bıylǵy 16-18 qańtarda Amerıka Qurama Shtattaryna resmı saparmen baratyny habarlandy.
Memleket basshysynyń Jarlyǵymen Asqar Isabekuly Myrzahmetov Jambyl oblysynyń ákimi bolyp taǵaıyndaldy.
2018 jyly birqatar zań óz kúshine endi. Onyń ishinde, kólik júrgizýshilerine salynatyn aıyppul kólemi tómendeıdi. Pedofılderdi hımıalyq pishtirý jazasy 2018 jyldyń birinshi qańtarynan kúshine endi.
Elimizde 1 qańtardan bastap QR normatıvtik quqyqtyq aktilerindegi salyq salý máseleleri jónindegi túzetýler kúshine endi, sáıkesinshe mindetti áleýmettik medısınalyq saqtandyrýdy engizý merzimi 2018 jyldan 2020 jylǵa aýystyryldy.
***
2018 jyldaǵy Úkimettiń alǵashqy otyrysynda QR Premer-mınıstri Baqytjan Saǵyntaev Elbasynyń Joldaýyna qatysty birqatar tapsyrmalar júktedi.
Memleket basshysy «Qazaqstan Respýblıkasy men Túrkimenstan arasyndaǵy strategıalyq áriptestik týraly shartty ratıfıkasıalaý týraly» Qazaqstan Respýblıkasynyń Zańyna, «Qazaqstan Respýblıkasy men Túrkimenstan arasyndaǵy Qazaqstan-Túrkimen memlekettik shekarasyn shegendeý týraly kelisimdi ratıfıkasıalaý týraly» Qazaqstan Respýblıkasynyń Zańyna jáne memlekettik aýdıt jáne qarjylyq baqylaý júesin jetildirýge baǵyttalǵan «Memlekettik aýdıt jáne qarjylyq baqylaý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Allen Sháıjúnisov «Astana EKSPO-2017» UK» AQ Basqarma Tóraǵasynyń orynbasary bolyp taǵaıyndaldy.
***
QR Aqparat jáne komýnıkasıa mınıstrligi ulttyq aqparattyq keńistiktiń avtomattandyrylǵan monıtorıń júıesin óz ıeligine alady. «Ulttyq aqparattyq keńistiktiń avtomattandyrylǵan monıtorıń» júıesin qurý maqsatynda respýblıkalyq búdjetten 1,671 mıllıard teńge bólindi.
***
2017 jyly jeltoqsanda jumyssyz júrgen adamdardyń sany 441,8 myńdy qurady. 2017 jylǵy qarashada halyqtyń jan basyna shaqqandaǵy ataýly aqshalaı tabysy 81 myń teńgeni qurady, bul bir jyl burynǵydan 1,5% tómen ekeni belgili boldy.
Shetelde ne jańalyq bar?
8 qańtarda Túrkimenstanda 2017 jyldyń jeltoqsanynan bastap áıelderge kólik júrgizýge tyıym salyndy. Al Iranda bastaýysh mektepterde aǵylshyn tilin oqytýǵa tyıym salyndy.
Al qańtardyń toǵyzynda KHDR men Ońtústik Koreıa mınıstrlik deńgeıinde ózara kelsissóz júrgizýdi, atap aıtqanda aradaǵy qarym-qatynasty jaqsartýǵa baǵyttalǵan alǵashqy qadamdy jasady.
***
Búkilálemdik boks keńesi (WBC) qazaqstandyq Gennadıı Golovkındi 2017 jyldyń úzdik boksshysy dep tanydy.
Ońtústik Koreıa kórshiles Soltústik Koreıa sportshylarynyń Phónchhandaǵy Olımpıada oıyndaryna qatysýy úshin osy elge salynǵan sanksıalardy jeńildetýi múmkin. Bul týraly Ońtústik Koreıa syrtqy ister mınıstrliginiń ókili No Gú Dok málimdedi.
***
Ózbekstan Qyrǵyzstanda avtomobılderge qyzmet kórsetý, aýyl sharýashylyǵy tehnıkasyn qurastyrý, plasıka buıymdaryn shyǵary jáne basqa da baǵyttardaǵy toǵyz kásiporyn ashatyny habarlady.
***
AQSH prezıdenti óziniń KHDR lıderi Kım Chen Ynmen jaqsy qarym-qatynasta ekendigin jetkizdi. Eki el arasyndaǵy shıelenisken baılanys retin taýyp jatqan kórinedi.
***
Saýd Arabıasy úkimeti vızany 25 jastan úlken, er adamsyz saıahattaıtyn áıelderge beretin boldy.
Aq úıde zań shyǵarýshylarmen ımıgrasıa saıasatyna qatysty kezdesý kezinde Tramp «Boqqa batqan eldiń adamdaryn biz ne úshin qabyldaýymyz kerek?» dep Kongres músheleriniń narazylyǵyn týǵyzdy.
Qytaıdyń Sýdjoý qalasynda 19 jastaǵy qazaqstandyq stýdent qyz 14-inshi qabattan qulap, qaza boldy. Oqıǵa 1 jeltoqsanda Shanhaı qalasynan 100 shaqyrym jerde ornalasqan Sýdjoý qalasynda boldy. 1999 jyly Almaty oblysynda týǵan stýdent qyz Sýdjoý qalasyndaǵy ýnıversıtetterdiń birinde 2-kýrsta oqyp júrgen.
***
Kalıfornıada tolassyz jaýǵan jańbyr saldarynan 18 adam kóz jumdy. Onyń ishinde 2 bala bar. Taǵy 28 adam jaraqat aldy.
Shoý-bızneste ne habar?
Otandyq basylymdar prodúser Baıan Alakózova, ánshi Tóreǵalı Tóreáli jáne aktrısa, bloger Aıjan Baızakova jaıynda jarysa jazyp jatyr.
Ánshi Merýert Túsipbaeva ózine til tıgizip, qoqan-loqy kórsetken Baıan Alakózova men Baǵym Muhıtdenovany sotqa beretinin aıtty. Al Tóreǵalı Tóreáliniń mýzykalyq prodúseri Jan Muqanov ánshi jaıynda jazdy. Al atyshýly Aıjan Baızakova tilshilerge suhbat berdi.
***
Tóreǵalı Tóráli men Móldir Áýelbekovanyń "Sen bolmasań" ánine túsirgen beınebaıany jaryqqa shyqty.
***
Qazaqstandyq prodúser Baıan Alagózova túsirgen «Qozy Kórpesh – Baıan sulý» serıaly halyq arasynda qyzý talqylanǵan edi. Ásirese, synap, serıaldyń ulttyq arnadan alynyp tastaýyn talap etkender kóp boldy. Osy tusta Baıan Alakózovanyń ákesi Maqsat Muhıtdenov taǵy da hat jazdy.
Has sulýdyń kóz jasyndaı, móldir óner - teatr
8 qańtarda Almaty qalasynda Muhtar Áýezov atyndaǵy drama teatrynyń dırektory Erlan Biláldiń isine qatysty baspasóz konferensıasy ótti. Konferensıada QR Teatr óneri qaýymdastyǵy 1,5 mıllıon teńge kóleminde paramen ustalǵan teatr dırektory Erlan Bilálǵa arasha túsip, óz pikirlerin ortaǵa saldy.
Atalmysh baspasóz konferensıasynda elimizge belgili akter Asanáli Áshimov te óz pikirin bildirdi.
9 qańtardan bastap Muhtar Áýezov atyndaǵy Qazaq memlekettik akademıalyq drama teatrynyń dırektory mindetin Jandarbek Sadyrbaev atqaratyn boldy.
Ózge de jańalyqtar
9 qańtarda Qaraǵandyda zańsyz mısıonerlik qyzmetpen aınalysqan psevdosalafıttik ýaǵyzshy Daryn Múbarov ákimshilik jaýapkershilikke tartyldy.
11 qańtarda elimizdiń soltústik óńirlerinde boran soǵyp, qytymyr qys ashýyna mindi. Nátıjesinde Astana qalasy men elimizdiń tórt oblysynda aýa raıynyń nasharlaýyna baılanysty joldar jabyldy.
Tabıǵı jaǵdaıdyń kúrt ózgerýine baılanysty, Astana qalasynyń ákimi Áset Isekeshevtiń sheshimimen tabıǵı sıpattaǵy tótenshe jaǵdaı jarıalandy.
***
Facebook áleýmettik jelisiniń negizin qalaýshy Mark Sýkerberg aldaǵy ýaqytta atalmysh jelide oryn alatyn ózgerister jaıynda aıtty.
Astanada Ulttyq ulan jaýyngerleri qudyqqa túsip ketken áıeldi qutqardy.
***
London men Nú-Iorktegi shıkizat bırjasyndaǵy saýda qorytyndysy boıynsha, munaı baǵasy ósti. Saýda qorytyndysy boıynsha, Brent markili munaıdyń naýryzdaǵy jetkizilim boıynsha fúchersteriniń quny Londondyq ICE Futures bırjasynda 0,61 dollarǵa artyp, barreline 69,87 dollar boldy.
Sholýshy: Aıgerim TAÝBAI
