Keshe Almatyda «Alataý» meıramhanasyna jınalǵan jurt jazýshy Jaqsylyq Sámıtulyn eske aldy. Qaıtqanyna on jyl bolǵan marqumga jubaıy - Mákılá, uly -Zańǵar jáne qyzdary arnap as berip, quran baǵyshtady. Bul týraly aqyn Almas Ahmetbekuly jazdy.
Jaqsylyq Sámıtuly asa talantty, Lırık jazýshy bolatyn. Ol jazǵan «Ana súti» bastaǵan áńgimeleri bizdiń stýdent kezimizdegi(1980j)ádebıet tanytqysh oqý quraly bolyp edi. Al, sol stýdent shaqtaǵy aýyldy saǵynyp aıtatyn «Týǵan jer» ániniń avtory da osy Jaqsylyq bolatyn.
«Týǵan jer nárin bergen,
Daryn bergen.
Baryn bergen.
Ózińniń tentegińmin áli de men».-dep keletin ándi bul kúnde qazaq topyraǵynyń shet –shegindegi jurttyń bári biledi.
Ol jazýshylyǵymen qosa Otan súıgish azamat bolatyn. Qazaqstan táýelsizdik alǵan kezde bir top qalamger inilerin bastap, azat elge qonys aýdarǵan alǵashqy kóshtiń basshysy edi, serkesi edi. Biz de sol Jaqań bastaǵan kóshtiń quramynda kelip edik.
Jaqsylyq Qazaqstanǵa alty balasyn jetelep, asyǵyp kóshti. Qazaqstan táýelsizdiginiń alǵashqy kúnderinen-aq Elinde - joǵary oqý oryndarynda, baspasózde qyzmet etti. Sóıte júrip, iri kolemdi prozalyq eńbekter qaldyrdy. Úsh tomnan turatyn «Qaharly Altaı» búkil Altaı jurtynyń hh ǵasyrdyń alǵashqy jartysyndaǵy kúresin, qarýly qarsylyqtaryn beıneledi. Onda Ospan bastaǵan batyrlardyn barlyǵynyń jankıar beınesi jasaldy.
Osy kitaptyń tusaý keserinde Qabeń - Qabdesh Jumadilov tebirenip, súıinip, súısinip aıtyp edi: «Jaqsylyq talantty jazýshy. Biz qaptaǵan talantsyz jazýshylardyń saǵy synbasyn dep «talant» degen sózdi qoldanbaı júrmiz. Al, búgin Jaqsylyqtyń kitaby týraly sóılegende «talant» degen sózdi qoldanbasqa sharamyz joq - ol talantty jazýshy.......Altaıda ótken batyrlar baqytty - ozinen ul týyp, ol sýretker bolyp, ol talantty bolyp, ol myqty prozash bolyp, táýelsiz Qazaqstanǵa qonys aýdaryp, olar týraly úlken eńbek jazdy jáne batyrlardyń beınesi osynshama talantty sýretkerdiń qolynan somdaldy. Bul - Altaıdyń Ospan bastaǵan batyrlarynyń baqyty» degen edi. Biz de osyǵan kelisemiz
Jaqsylyq Qazaqstan táýelsizdik alǵanda "asyǵyp kóshti" dedik qoı , ony asyqtyrǵan Altaı jurtynyń taýqymetti taǵdyry edi. Sol taǵdyr týraly tomdar edi. Sol taǵdyr týraly azat elde erkin silteıtin múmkindik edi. Er jasy elýge endi kelgen Jaqań sol úshin asyqty Elge, sol úshin asyqty erkindikke！ Osylaı asyǵys kóshkenine qaraı ol muratyna jetken jazýshy.
Sońǵy kóshtiń serkesi ediń, Jaqsylyq,
Sulý sózdiń erkesi ediń, Jaqsylyq.
Jarmasqan ǵoı taǵdyryńnyń qyrsyǵy,
Etegińe erte seniń, Jaqsylyq!
Qandy Altaıǵa qanyǵyp eń , Jaqsylyq,
Taǵdyryna taryǵyp eń, Jaqsylyq.
«Qaharly Altaı» qalamyńnan qan qusyp,
Mańdaıyńnan jarylyp eń, Jaqsylyq.
«Taǵdyr júgin art» desetin Jaqsylyq,
«Azat elge tart» desetin Jaqsylyq.
Kúler bolsa shalqasynan shashylyp,
Shamyrqansa shart ketetin, Jaqsylyq.
Erkin elde erýlediń, Jaqsylyq,
Talantyńa senýli ediń, Jaqsylyq.
Qazaq eli azattyǵyn alǵanda,
Bar bolǵany elýde ediń, Jaqsylyq.
Saýyr taýdaı eńseń bolǵan, Jaqsylyq,
Ton jaǵasy seńseń bolǵan, Jaqsylyq.
Taǵdyr bitip taýsylǵanda ýaqyty,
Taýqymeti tom -tom bolǵan, Jaqsylyq.
