QR Eńbek jáne áleýmettik qorǵaý mınıstri Tamara Dúısenova «Abý-Dabı Plaza» kesheninde azamattardy jappaı jumystan shyǵarýǵa qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge ala otyryp.
«Ár kásiporyn ózine jumysshy tartqan kezde, jumys kólemin belgileıdi. Abý-Dabı Plazada jumys isteıtin 4 uıym úshin qurylys pen qosymsha jumys kólemi belgilendi. Endi sol jumys aıaqtalyp otyr. Kelisimshart bekitken kezde jumys merzimi de belgilenedi. Qazirgi tańda kompanıa basshylary eńbek ınspektorlaryna jumysshylaryna josparlanǵan jumys kólemi aıaqtalyp jatqanyn aldyn ala habarlaǵandaryn málimdedi. Abý-Dabı Plazadaǵy tórt mekeme jumyskerlerine aldyn ala eskertken. Qazir jergilikti atqarýshy organnyń eńbek ınspeksıasy toby oqıǵa ornyna attanyp, jumys berýshilermen sóılesti. Birinshisi, olar jumysshylarǵa jumys kólemi bekitilgen kelisimshartqa sáıkes aıaqtalǵany týraly habarlandyrý beretin boldy. Ortasha jalaqy kóleminde ótemaqy tólenedi. Qazir osyndaı ýaǵdalastyqqa qol jetti», — dedi Dúısenova.
«Eńbek kodeksinde naqty kórsetilgen: kásiporynnyń ekonomıkalyq jaǵdaıynyń nasharlaýyna baılanysty azamattar jappaı jumystan shyǵarylsa, eki aılyq jalaqy qarastyrylǵan. Eger birinshiden, bul jumys kóleminiń azaıýıyna jáne ekinshiden, bul týraly eńbek kelisimshartyn bekitken kezde aıtylsa, onda bul jumys kólemi oryndalǵannan keıin jumystan shyǵarý dep sanalady jáne ótemaqy retinde bir aılyq jalaqy tólenedi», — dedi mınıstr.
Eske salyp ótsek, elordada salynyp jatqan "Abý-Dabı Plaza" kesheniniń jumysshylary narazylyqqa shyqty. BAQ-tyń habarlaýynsha, qurylys alańynda isteıtin 400-ge jýyq adam bir kúnde jumyssyz qalǵan. Qurylys kompanıalary aldyn ala eskertpeı, ótemaqy tólemeıtinin de ashyq aıtqan kórinedi.
Astanadaǵy Abý Dabıdi jergilikti jumysshylarmen qatar sheteldik qurylysshylar da salyp jatyr. Biraq, jappaı jumystan qýý týraly tosyn buıryq tek el azamattaryna qatysty. Dalada qalǵan jumysshylar bolsa, qurylys kompanıalary tıisti ótemaqyny tólegenshe tynym tappaımyz dep otyr.
Dúısenova eńbek ınspeksıasynyń jumysy aıaqtalǵannan keıin, qosymsha aqparat habarlanatynyn atap ótti.
