Belgili dáriger, bıologıa ǵylymdarynyń doktory Saltanat Baıqoshqarova 1960 jyly 2 aqpanda dúnıege keldi.
Saltanat Baıqoshqarova 2017 jyly «Qazaqstannyń 100 jańa esimi» tizimine engen. «Qurmet» ordenimen, «QR Densaýlyq Saqtaý Mınıstrliginiń «Densaýlyq caqtaý isine qosqan úlesi úshin» medalimen marapattalǵan. Ulttyq Medısına Asosıasıasynyń «Altyn Dáriger» ataǵyn ıelengen.
Saltanat Berdenqyzy el medısınasynyń damýyna ólsheýsiz úles qosyp keledi. Áli de asar asýy alda ekenine shúbá joq. Qazaq balalarynyń bolashaǵy úshin eńbek etip júrgen dáriger jaqynda Qamshy.kz aqparat agenttigi uıymdastyrǵan «Alash arystarynyń izbasary» ataǵyn aldy. Aıta keteıik, ol kisi búkil Qazaqstan boıynsha júrgizilgen saýalnama nátıjesinde osy ataqqa laıyq dep tanyldy.
Saltanat Baıqoshqarovanyń densaýlyq saqtaý salasyna sińirgen eńbegi zor. Ol Qazaqstandaǵy alǵashqy deneden tys uryqtandyrý (DTU) laboratorıasynyń – «Ekomed» emhanasynyń negizin qalady. Qazaqstanda jáne Ortalyq Azıada tuńǵysh ret DTU ádisin qoldandy.
Saltanat Baıqoshqarova eńbek jolyn 1988 jyly dáriger-laborant bolyp bastady. Medısınadaǵy alǵashqy adymynan-aq erler bedeýliginiń sebebin zerttedi. Jasandy uryqtandyrý baǵytynda túrli ádisterdi engizdi. Sóıtip júrip, Qazaqstanda birinshi «qutydaǵy balanyń» dúnıege kelýine septigin tıgizdi.
Saltanat Baıqoshqarova 50-den astam ǵylymı jumys jazǵan. Tek Qazaqstanǵa ǵana emes, álemge áıgili Saltanat Baıqoshqarovany týǵan kúnimen quttyqtaı otyryp, zor densaýlyq pen uzaq ómir tileımiz. Qazaqstandaǵy medısına salasynyń qaryshtap damýyna atsalysyp, ǵylymı jańalyqtarymen qýanta beretinine kámil senemiz!
