Almatynyń Almaly aýdandyq sotynda Muhtar Áýezov atyndaǵy qazaq memlekettik akademıalyq drama teatrynyń burynǵy dırektory Erlan Bilálge úkim shyqty, dep jazady Qamshy.kz aqparat agenttigi.

Sýdıa Qýanysh Áripov Erlan Biláldi Qylmystyq kodekstiń 24-babynyń úshinshi tarmaǵy (Qylmysqa daıyndalý jáne qylmysqa oqtalý) jáne 366-babynyń ekinshi tarmaǵy (Para alý) boıynsha aıypty dep tanyp, 52,5 mıllıon teńge aıyppul saldy. Aıyppuldy bir aı ishinde tólemese, úsh jyldan jeti jylǵa deıin túrmege otyrýy múmkin ekenin eskertti. Sonymen qosa memlekettik qyzmetpen aınalysý quqyǵynan aıyryldy.

Qýanysh Áripov «Qazaqstannyń eńbek sińirgen qaıratkeri», «Qurmet» ordeninen aıyrý týraly usynys jasady.

Esterińizge salsaq, Erlan Bilál 5 qańtarda ustalǵan edi.  8 qańtarda zıaly qaýym ókilderi Erlan Biláldi qorǵap, sóz sóıledi. 16 qańtarda akterdiń 1 205 000 teńge kóleminde kepilge aqsha tólegeni belgili boldy. 25 qańtarda Almatydaǵy Almaly aýdandyq sotynda Erlan Biláldiń soty bastaldy. 

Sottaǵy sońǵy sózinde Erlan Bilál óz kinásin moıyndap, jasaǵan isine ókinetinin aıtqan. Ártis sýdıadan densaýlyǵy men otbasylyq jaǵdaıyn eskerýdi ótindi. Bas bostandyǵynan aıyrmaýdy, múmkindiginshe aıyppul somasyn tómendetýdi surady.