Almaty oblysy Eńbekshiqazaq aýdany Qarakemer kentinde ornalasqan 6654 áskerı bóliminiń bazasynda kınolog mamandardyń biliktiligin joǵarylatý (qaıta daıarlaý) kýrsy ashyldy. Atalǵan kýrs Amerıka qurama shtattarynyń Qazaqstan Respýblıkasy elshiligindegi áskerı yntymaqtastyq bóliminiń uıymdastyrýy arqyly, esirtkimen kúres baǵdarlamasy aıasynda ótedi, dep habarlaıdy Qamshy.kz aqparat agenttigi.
Tórt aptaǵa sozylatyn oqý barysynda AQSH-tyń kontrabandamen kúres jónindegi tájirıbeli mamandary Ulttyq ulan kınologtaryna jańa ádisterdi úıretpek. Ulttyq ulannyń ár óńirinen kelgen kınolog mamandar men olardyń qyzmettik ıtteri geroın, marıhýana jáne sıntetıkalyq esirtkilerdi tabý joldarynyń meılinshe jetilgen tásilderin meńgeretin bolady. Osy maqsatta is-tájirıbelik oqýlar men trenıńter neǵurlym shynaıy bolýy úshin arnaıy nysandarda ótkiziledi. Bul kýrstyń Qazaqstan jáne Amerıka sarapshylary úshin kınologıa salasynda pikir almasý, ózara yntymaqtastyq sharalaryn keńeıtý jáne qyzmettik ıtterdi daıyndaý boıynsha tájirıbe bólisýde bereri zor.
Oqý kýrsynyń ashylýyna Amerıka tarapynan esirtkimen kúres baǵdarlamasynyń menedjeri maıor Krıstofer Kent jáne kınolog-nusqaýshylar Brús Gýdeıl men Skot Zaıtner keldi. Maıor K.Kent sóılegen sózinde atalǵan baǵdarlama aıasynda bul Qazaqstanda ótkizilip jatqan úshinshi, al Ulttyq ulannyń ózinde birinshi kýrs ekendigin atap ótti. Ár elde qoldanylatyn ıtpen esirtki izdeý tásilderi ár túrli ekendigin, sonyń ishinde amerıkalyq tásilderdi de bizdiń tájirıbege qosý maqsatynda kelgendikterin aıtty. Kınolog-nusqaýshy B. Gýdeıl arnaıy alyp kelgen jabdyqtarymen tanystyryp, olardy qalaı qoldaný kerektigin kórsetip shyqty. Halyqaralyq trenıń sońynan ulandyqtar emtıhan tapsyryp, sertıfıkat alady, kýrsty aıaqtaǵan ár kınologqa amerıkalyq qural-jabdyqtar syıǵa beriledi. Arnaıy kýrstan ótken mamandar bolashaqta amerıkalyq tásildi úıretý boıynsha derbes nusqaýshy bola alady.
Aıta keter bolsaq, Qarakemer kentindegi kınologıalyq ortalyq – Ulttyq ulandaǵy biregeı ortalyqtyń biri. Qyzmettik ıtterdiń tuqymyn asyldandyrý, kóbeıtý, olardy qajetti maqsatta paıdalaný úshin daıyndaý jáne qyzmetke paıdalaný 1962 jyldan bastap qolǵa alynǵan. Ár jylda eki júzden astam áskerı qyzmetshi Qazaqstannyń ár óńirinen kelip, áskerı kınolog mamandyǵyn alyp shyǵady.
Ulttyq ulan «Ońtústik» óńirlik qolbasshylyǵynyń baspasóz qyzmeti,
maıor Baımaǵanbetova Danara
