Oqıǵa Qorǵaljyn aýdany A.Tóleýbaev atyndaǵy orta mektebiniń janyndaǵy mektep ınternatynda bolǵan. Jábirlenýshiniń aıtýynsha, aýyl ákimi ulyn aıaýsyz soqqyǵa jyqqan. Bul týraly Facebook áleýmettik jelisiniń qoldanýshysy Nazgúl Nurtaı óz paraqshasynda jazdy. Qamshy.kz aqparat agenttigi soqqyǵa jyǵylǵan balanyń anasyna habarlasyp, oqıǵanyń mán-jaıyn surady.
–Men, Bekjanova Aıgúl Qapanqyzy 03.08.1981 j.t. jábir kórýshi anamyn. Ulym Muqan Dıas Tólegenuly 11.01.2004 j.t. Qorǵaljyn aýdany A.Tóleýbaev atyndaǵy orta mektebiniń 8-synyp oqýshysy. Ulym, Muqan Dıas Qorǵaljyn aýdany Qorǵaljyn aýyldyq okrýgi ákimi Omarov Janat Jumataıuly (11.09.1982 j.t.) tarapynan soqqyǵa jyǵyldy, - dep jazdy úshinshi toptaǵy múgedek ana.
–Bul jaǵdaı qalaı bolǵanyn basynan baıandaıyn. 22.02.2018 jyly aýyl ákiminiń, ıaǵnı, Omarov J.J. uly Jumataev Nurıslam Janatuly (14.10.2005 j.t.) men meniń ulym qońyraý kezinde sózge kelispeı shektigisip qalady, Dıas ákimniń ulynyń kózin kógertedi. Biraq mektep ishinde ózara dırektordyń orynbasary jáne synyp jetekshileri ekeýin tatýlastyrady. Sabaq bitkennen soń Dıas sol mektep janyndaǵy ınternatqa kep, túski asyn iship, kitap oqýǵa kirisedi. Kenetten Omarov Janat esikten julqyna kirip, «Dıas degen kim?» dep aıqaı salady. Dıas ornynan tura bergende, «áne, ol» degen bir balanyń daýysy shyǵady. Omarov Janat Dıastyń jaǵynan bir salady, bala qasynda turǵan shkafqa basyn soǵyp, esin joǵaltady. Jerge sulap túsken balany ÁKIM BASYNAN ÚSH RET, KEÝDESINEN BIR RET TEPKILEIDI. Bala esinen múlde aıyrylyp, tili kúrmetilip, tilin shaınaı bastaıdy. Bir bólmede turatyn balalar shoshyp, ne isterlerin bilmeı turyp qalady. Sol jerde Dıasqa medısınalyq alǵashqy kómek kórsetilip, Qorǵaljyn aýdandyq aýrýhanasyna saǵat 13.00-de jedel járdemmen jetkiziledi. Aýrýhanada bala esin bilmeı bir táýlik jatty. Men, anasy, estı sala aýrýhanaǵa barǵanymda, balanyń esh jeri synbaǵan, «legkıı stepen sotrásenıe» dep anyqtamasyna jazyp berdi. Sol jerde Qorǵaljyn AIIB qyzmetkeri kelip, aryz jazdyrtyp alyp ketti. 23.02.2018 jyl keshki saǵat 22:00-de aýrýhana meńgerýshisine aıtyp, Astana qalasyna tolyq tekserýden ótkizýge alyp kettim. Astana qalasynyń №2 aýrýhanasyna 23.02.2018 j.saǵat túngi 12 shamasynda kelip tústik. Qazir ulym osy aýrýhananyń neırohırýrgıa bóliminde jatyr. Tolyq tekserýden ótti. Esin emis-emis biledi. Sózge keldi. Júre almaıdy, basy aınalady, júregi aınyıdy. Búgin 25.02.2018 j. neırohırýrg dáriger tekserisinde balam saýsaǵyn muryn ushyna apara almady. Endi dárigerler dúısenbide tomografıaǵa basyn túsiretin boldy, - deıdi Dıastyń anasy Aıgúl Bekjanova.
Aıgúl Bekjanova — úshinshi toptaǵy múgedek, Qorǵaljyn aýdany Ekpindi aýyly mektebiniń muǵalimi.
–Bala urmaq túgili, qatty daýys kóterip urysa almaımyz. Bul jerde bildeı bir AÝYL ÁKIMINIŃ ulymdy sonsha TEPKENINE beıjaı qarap otyra almaımyn. Jazasyn alsyn. Zań aldynda jaýapqa tartylsyn. Qazir bul isti Qorǵaljyn AIIB qarastyryp jatyr. Astanaǵa kelgenimizge búgin bir táýlik boldy. Eshbir polısıa qyzmetkeri kelmedi, - dep óz kúıinishin jazdy Aıgúl Bekjanova.
Aıgúl Bekjanovanyń aıtynsha, Dıas «Ol mektepke qaıta barmaımyn. Artymnan izdep keledi»,- dep esin jıa almaı otyr.
Dıastyń anasy ulynyń bolashaǵy úshin alańdaýly. «Ulym da ózim sekildi múgedek bola ma?» dep janyn shúberekke túıip otyr.
8-synyp oqýshysyn soqqyǵa jyqqan Qorǵaljyn aýyldyq okrýgi ákimi Omarov Janat Jumataıulyna da habarlastyq, alaıda aýyl ákimi qońyraýymyzǵa jaýap bermedi.
