Ómirde bir baı kisi bolypty. Ol bul dúnıede qoly jetken nyǵymetteriniń barshasyna rıza bolsa da, qalap alǵan jaryna kóńili tolmapty. Áıeliniń minezi, júris-turysy, qonaq kútimi, sózi men kúlkisi de onyń qolaıyna jaqpapty.
Bir kúni ol danagóı qarttyń aldyna kelip júginipti. Sózdi muqıat tyńdaǵan dana:
— Ol qyzdy óziń qalap aldyń ba, ári onyń qyz kúninidegi minez-qulqyn bilesiń be? — dep surapty. Sonda álgi kisi:
— Iá, ózim súıip qosyldym. Qyz kúninde óte sypaıy, salıhaly jan edi, keıin ózgerip ketti. «Qyz kúninde qyzdyń bári jaqsy, jaman áıel qaıdan shyǵady?» — degendeı, sonyń syryn ózim de bilmeı basym qatty, - depti. Sonda álgi dana qart:
— Balam, Alla taǵala adamǵa urpaq sılaıdy, kimge qalasa ul, kimge qalasa qyz, kimge qalasa ekeýin de beredi. Al jaman áıel nemese jaman erkekti adamdardyń ózderi jasap alady. Áıelińniń «súıkimsiz» janǵa aınalýyna seniń óziń kinálisiń. Esińde bolsyn ár áıel ózinshe bir álem. Ol álemdi ózińniń álemińdeı etemin dep kúshke salsań, onyń qalyptasqan júıesin búldiresiń. Al buzylǵan júıeden bir kezdegi keremetterdi qaıtadan kútý ábestik bolar, — depti. Sózdiń mánisin túsingen álgi adam sana tarazysyna salyp, óziniń áıeli aldyndaǵy jaýapkershiligin ádil ári tolyq óteı almaǵandyǵy úshin áıelin ózine qarsy qoıyp alǵandyǵyn, sonyń nátıjesinde onyń «súıkimsiz» janǵa aınalyp ketkenin uǵyp: «Jaqsy jerge kelgen kelin - kelin, jaman jerge túsken kelin - kelsap», — degen halyq danalyǵynyń mánine boılap, ishteı qatty ókinipti. Keterinde dana aqsaqaldan:
— Endi ne istesem oń bolar edi?-dep keńes surapty. Sonda danyshpan:
— Balam, erkek kindiktiniń qashanda esinde júretin bir erejesi bar. Sony umytpasań aldaǵy kúnderińde áıeliń kózińe «súıkimdi» bola bastaıdy. Qyz degen názik úmit pen aıaýly sezimmen ǵumyr keshetin názik jaratylys. Olardyń jasy qanshaǵa kelse de, júrekterinde sol bir úlbiregen názik sezim men er adamǵa degen qaltqysyz senimnen quralǵan bala kúngi beınesi ornyǵyp qalady. Júrekterindegi sol «kishkentaı qyz» ol aqsamaıly áje bolsa da, sol balǵyn, pák kúıinde qala beredi. Talǵamsyz erkekter áıel júregindegi sol «kishkentaı qyzdyń» beınesin kóre almaı, pushaıman bolyp ótedi. Áıelińiz hanyshaıym bolsa da, ot basy, oshaq qasyndaǵy kúldi-kómesh sharýa áıeli bolsa da, olardyń júreginde máńgilik qartaımaıtyn qyz beınesi baryn umytpańyz. Talǵampaz bolsańyz sol beıneni kóre alasyz, kóre bilseńiz áıelińizdi máńgi súıip ótesiz. Áıeldi aıalasańyz ómirińizdiń qalaı nurǵa bólengenin baıqamaı qalatyn naǵyz baqytty erkekke aınalasyz. Erkek baqytynyń erejesi osy, — depti sabyrly únmen.
