Qazaqstannyń orta mektepterine fýtbol pán retinde engizilýi múmkin. Bul jaıynda Qazaqstan fýtbol federasıasynyń prezıdenti Erlan Qojaǵapanov ÝEFA baspasóz qyzmetine bergen suhbatynda málimdedi.

"Biz fýtboldy orta bilim berý júıesine engizýdi josparlap otyrmyz jáne bul usynymyzdy úkimettiń aldyna qoıdyq. Qazir bul máseleni parlamenttiń qaraýyna usynbaqpyz. Bizdiń elde fýtbolǵa qyzyǵýshylyq tanytyp,  aınalysqysy keletinder óte kóp. Biraq, olardyń barlyǵynda múmkindik joq. Ásirese, kúnniń sýyǵynda. Sol úshin tóbesi jabylatyn alańdar kerek", -  dedi Qojaǵapanov.

QFF prezıdenti atap ótkendeı, ol óz áriptesterimen Qazaqstandaǵy fýtbol deńgeıiniń tym tómendigi jaıynda kóp talqylaǵan. Al onyń basty sebebi fýtbol ınfraqurylymynyń damymaýy degen nátıjege kelipti.

"Bizdiń eldiń basym bóliginde qys uzaqqa sozylady. Al jastarymyz jyl on eki aı jattyǵýy úshin tóbesi jabyq fýtbol alańdary qajet. Eger, 1 alań 100 myń adamǵa jetedi dep eseptesek, qazirgi tańda olardyń sany 170 bolýy kerek eken. Ókinishtisi, fýtbol nysandaryn salý qarjy jaǵynan óte qıyn másele", - dedi ol.

Atalǵan saladaǵy taǵy bir úlken problema - bilikti bapkerlerdiń joqtyǵy. Qojaǵapanovtyń aıtýynsha, bizdiń elde bir bapkerge 342 shákirtten keledi eken. Al Anglıada ár bapkerge nebári úsh shákirtten tıesili.

"Sondyqtan, biz Platını myrzadan bilikti bapkerlerdi daıarlaýǵa kómektesýin suraımyz. Bul bizdiń eldegi balalar fýtbolynyń damýyna úlken kómek bolmaq", - deıdi federasıa prezıdenti.