21 naýryz, sársenbide Aqtóbe qalasyna qarasty Sazdy aýyldyq okrýginde Naýryz meıramy qarsańynda jańa dárigerlik ambýlatorıa ashyldy, dep jazady Qamshy.kz aqparat agenttigi.

Medısınalyq mekeme memlekettik-jekemenshik seriktestik aıasynda júzege asyrylǵan kezekti áleýmettik mańyzy bar joba bolyp tabylady.

Saltanatty sharaǵa oblys ákimi Berdibek Saparbaev qatysty.

- Memleket basshysy Nursultan Nazarbaevtyń tapsyrmasyna sáıkes, ótken 26 jyldyń ishinde elimizde halyq densaýlyǵyn jaqsartý jáne densaýlyq salasyn damytýdyń aýqymdy jumystary júrgizildi. Tek Aqtóbe oblysynyń ózinde sońǵy jyldary ondaǵan medısınalyq mekeme ashylyp, medısınalyq klaster quryldy. Bizdiń maqsatymyz – aqtóbelikter barlyq qajetti medısınalyq qyzmetti oblystan shyqpaı-aq, joǵary sapaly deńgeıde alý úshin jaǵdaı jasaý,-dedi óziniń quttyqtaý sózinde óńir basshysy.

Oblys ákimi sondaı-aq, aqtóbelikterdi Naýryz merekesimen quttyqtap, olarǵa otbasy amandyǵyn tiledi.

Jobanyń júzege asyrý quny - 83 mln. teńge. Ǵımarattyń alańy shamamen 400 sharshy metr, ınfeksıalyq aýrýhanaǵa qaraı arnaıy jol bar. Medısınalyq mekeme Baýyrlastar–1 jáne Baýyrlastar–2 shaǵyn aýdandarynda turatyn 3 myńdaı adamǵa qyzmet kórsetpek. Josparly qýattylyǵy – bir aýysymda elý adamdy qabyldaý.

Jańa ambýlatorıada aýyl turǵyndary zerthanalyq zertteýlerdiń standartty jıyntyǵyn, stomotologıalyq kómek, fızıoterapıalyq jáne prosedýralyq kabınetterdiń qyzmetin, kúndizgi stasıonar jaǵdaıyndaǵy em alý qyzmetterin alady. Ambýlatorıa shtaty qajet mamandarmen jasaqtalǵan. Jalpy dárigerlik tájirıbe jáne pedıatorlyq ýchastok sekildi eki ýchaskesi bar. Keleshekte tar sheńberli mamandar qyzmet kórsetedi dep josparlanýda.

Aıta keteıik, mereke kúnderi oblysta taǵy tórt medısınalyq mekeme paıdalanýǵa berilmek. Atap aıtqanda, Aqshat, Ýkraınka, Magajan aýyldary men K.Nokın atyndaǵy kentte dárigerlik ambýlatorıalar men feldsherlik-ambýlatorıalyq pýnktter alǵashqy naýqastaryn qabyldaıdy.

Byltyr aýyldyq eldi mekenderde MJS aıasynda salynǵan 21 medısınalyq nysannyń qurylysy bastalǵan bolatyn. Olardyń deni qazirdiń ózinde iske qosyldy.