«Áz Naýryz» merekesi– qazaq halqynyń ǵana emes eńsesi bıik egemendi elimizde turatyn basqa da ult ókilderi dúbirletip toılaıtyn, saǵyna tosatyn ulyq merekesi bolyp sanalady. Bul kóktemniń ataýly merekeleriniń biri jáne biregeıi, jańasha ómir syılaıtyn mereke dep sanalady. Qazirgi kúntizbe boıynsha kún men túnniń teńesip, jińishkeniń úzilip, jýannyń jińishkergen ýaqyty - 22 naýryz.

Osynaý el men eldi yntymaq pen birlikke umtyldyratyn meıram aýdanymyzda aǵymdaǵy jyldyń 21 naýryzy kúni Abaı dańǵyly boıynda dýmandatyp ótkizildi. Dúıim el-jurtymen jınalǵan dúbirli toıdyń saltanatty sahnasynda Naýryzbaı aýdany ákimi Saıfedenov Saıran Tápenuly aǵynan jarylyp, jınalǵan jurtshylyqqa aq tilegin jetkizdi:

Ol óz sózinde: «Qazaq eli budan da surapyl syndardy eńserip, bıik asýlardy baǵyndyrǵan, sabyr saqtap, yntymaq-birligin bekite túsken. Qıyndyqtardy birlese jeńip otyrǵan. Ata-babalarymyz esh ýaqytta jetimin jylatpaǵan, jesirin qańǵytpaǵan, álsizge kómektesip, qulaǵandy qoltyǵynan súıegen, álsizderge qolushyn berip, qoldaý bildirgen. Osyndaı sheshýshi shaqta beldi bekem býyp, táýelsizdik týynyń tóńiregine tyǵyz toptasyp, keleshektegi kemel kúnderge bir úıdiń balasyndaı, bir qoldyń salasyndaı bolyp umtylýymyz qajet» -dep atap ótti.

Jańa aýdanda jańasha, keń kólemdegi «Áz Naýryz» merekesi atalap ótti. 16 qanatty, 12 qanat jáne 10, 8 qanatty aqshańqan Astana qalasynyń 20-jyldyǵyna oraı 20 qazaq úıi tigilip, árbir kıiz úıge aýyl attary berilip, ár aq otaýdyń aldynda ulttyq qundylyqtarymyzdy dáripteıtin qazaqtyń qasıetti salt-dástúrleri, atap aıtqanda «Tusaý kesý», «Syrǵa salý», «Quda túsý», «Qyz uzatý», «Syńsý aıtý», «Kelin túsirý», «Jar-Jar», Betashar», «Shildehana», «Besikke salý», «Qyrqynan shyǵarý» jáne t.b. qazaqı salt-dástúrler kópshilikke usynylyp, tamashalandy.

Tórt saǵattyq konserttik baǵdarlama barysynda 50-ge jýyq ártis óner kórsetip, 5000-nan asa aýdan turǵyndary men qonaqtary arnaıy aq dastarhannan dám tatyp, qasıeti mol «Naýryz kóje» iship, máre-sáre bolysty. Mereke aýdan ákiminiń «Tusaý keser» dástúrimen shynaıy túrde sábıdiń tusaýyn kesýimen bastaý aldy.

Sonymen qatar «arqan tartys, tumaq urý, jamby atý» syndy sporttyq is-sharalar uıymdastyrylyp, jeńimpazdarǵa aýdan ákiminiń «Alǵys haty» jáne syılyqtary tartý etildi.

Aýdan ákimi apparatynyń bastamasymen «Ulystyń Uly kúni – áz Naýryz-2018» atty Tól merekesiniń «Naýryz naqyshtary» baǵalanyp, báıgege «Eń úzdik kıiz úı», «Eń úzdik aq dastarhan», «Eń úzdik salt-dástúr» nomınasıalary tigildi.