2011 jyly «ekstremızm» baby boıynsha 12 jylǵa sottalǵan profesor Saıat Ybyraevtyń merziminen buryn bosap shyǵýyna esh kedergi joq. Bul týraly Saıat Ybyraevtyń isimen aınalysyp júrgen advokaty Abzal Quspan Qamshy.kz aqparat agenttiginiń tilshisine aıtyp berdi.

Advokattyń dál qazirgi ýaqytta kóterip otyrǵan eń mańyzdy máselesi – Saıat Ybyraevty merziminen buryn shartty túrde bosatý.

«Saıat Ybyraev zańsyz sottaldy ma, zańdy ma – bul mańyzdy emes. Bizdiń qazirgi kóterip otyrǵan másele – profesorymyzdy merziminen buryn shartty túrde bosatý. Onyń jasy qazir 51-de. Ǵylymǵa bergeninen bereri kóp.

Úkim shyqqaly Semeıdegi qatań rejımdegi kolonıasynda jazasyn ótep jatyr. Osy jyldar ishinde múldem tártip buzǵan joq. Qaıta kitap jazyp, ǵylymı jumystarmen aınalysyp jatyr», - degen advokat Saıat Ybyraıdyń Qazaqstanǵa kerek tulǵa ekenin atap ótti.

«Bárimizge belgili, ol – tehnıka ǵylymdarynyń doktory. Qazir túrmede ekenine qaramastan, aınalysyp júrgen baǵyty – robototehnıka. Qazaqstanda bul salanyń teorıasyn da, praktıkasyn da jetik meńgergen ǵalym ol. Dál Saıat Ybyraıdyń deńgeıinde ǵalym joq. Saıat Ybyraevty túrmeden shyǵarǵannan utpasaq, utylmaımyz.

Ádette qoǵamǵa qaýipti adamdardy: adam óltirgen, bala zorlaǵan, urlyq jasaǵandardy sottaıdy. Sanaly ǵumyryn ǵylymǵa arnaǵan Saıat Ybyraevtyń qoǵamǵa tıgizer paıdasy kóp», - dedi Abzal Quspan.

Advokattyń aıtýynsha, zań boıynsha ǵalymdy merziminen buryn bosatýǵa esh kedergi joq. Buǵan deıin Saıat Ybyraıdy merziminen buryn bosatý týraly ótinishke Semeı qalalyq soty qarsy jaýap bergen. Alaıda Abzal Quspan qaıta shaǵym jasady. Bıyl sáýirdiń ortasynda SHQO sotynyń appelásıa alqasy shaǵymdy qaraıtyn bolady.

Aıta keteıik, búgin qazaqtyń bir top zıalysy joǵarǵy sot tóraǵasy Jaqyp Asanovtyń atyna Saıat Ybyraevty merziminen buryn bosatý máselesin kóterip, ashyq hat joldady. Onda Smaǵul Elýbaı, Asqar Jumadildaev bastaǵan bir top zıaly álemdik deńgeıde moıyndalǵan qazaq ǵalymynyń ólsheýsiz eńbekterin aıtyp, sondaı adamnyń búginde túrmede otyrǵanyna ókinish bildirgen.

«Saıat Ybyraevtyń ǵylymda jańalyq ashar der shaǵy. Ol el ıgiligine jarar talaı ǵylymı jańalyqtarǵa muryndyq bolar edi, ınovasıalyq baǵytta kóshimizdiń túzelýine at salysar edi,  ustazdyń dárisine zárý jastarǵa tálim berer edi», - delingen ashyq hatta.

Al 2017 jyldyń sońynda Qamshy.kz portaly ótkizgen halyqtyq saýalnama nátıjesinde Saıat Ybyraev táýelsizdiktiń nyǵaıýyna qosqan úlesi úshin halyqtyq «Alash arystarynyń izbasary» qurmetti ataǵymen marapattaldy. Atalmysh medalmen búginde tar qapasta jatqan taǵy birneshe azamat marapattaldy.