Qazaqstan Respýblıkasynyń Din isteri jáne azamattyq qoǵam mınıstrligi elimizdiń barlyq óńirlerinde memlekettik áleýmettik tapsyrysty júzege asyrý úrdisine qoǵamdyq baqylaý júrgizedi, dep jazady Qamshy.kz aqparat agenttigi QR Din isteri jáne azamattyq qoǵam mınıstrligine silteme jasaı otyryp.

Atalǵan jumystardy júzege asyrýǵa «Desenta» qoǵamdyq qory, «Qazaqstan jastarynyń kongresi» zańdy tulǵalar birlestigi, «ZÝBR» konsaltıń- ortalyǵy sıaqty qoǵamdyq uıymdar qatysatyn bolady.

Qoǵamdyq monıtorıń sheńberinde memlekettik áleýmettik tapsyrys negizinde (áleýmettik zertteýler, fokýs-toptar, jurtshylyqpen jasalǵan saýalnamalar) qyzmet kórsetý sapasy týraly aqparatty jınaý jáne taldaý jumystaryn ótkizý josparlanýda.

QR Din isteri jáne azamattyq qoǵam mınıstrliginiń Azamattyq qoǵam isteri komıtetiniń málimetinshe, Memlekettik áleýmettik tapsyrystyń monıtorıńi - qyzmetterdiń sapasyn júıeli jaqsartý jáne memlekettik áleýmettik tapsyrystyń tıimdi quraly bolyp tabylady. Ol memlekettik áleýmettik tapsyrys aıasynda qyzmet kórsetýlerge júginetin halyqtyń, eń aldymen, azamattardyń áleýmettik jobalaryn júzege asyrýǵa baǵa beredi.  

Joba qorytyndysy  boıynsha áleýmettik mańyzy bar jobalardy tıimdi iske asyrýdy qamtamasyz etýge baǵyttalǵan jedel sharalar qabyldaý úshin usynystar ázirlenetin bolady.

«Komersıalyq emes uıymdardyń qyzmeti týraly Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zań jobasynyń sheńberinde áleýmettik jobanyń tıimdiligin jáne halyqtyń qyzmet sapasyna qanaǵattaný dárejesin anyqtaıtyn memlekettik tapsyrystyń nátıjelerin baǵalaýdy engizý josparlanyp otyr.

2018 jyly elimiz boıynsha 2 066 áleýmettik jobany júzege asyrý josparlanǵan.  Olardyń ishinde 40 joba respýblıkalyq deńgeıde,  2026 joba óńirlik deńgeıde iske asyrylatyn bolady.