OQO Saıram aýdanynyń Qarabulaq eldimekenindegi mektep muǵaliminiń ólimine qatysty sot prosesi aıaqtaldy dep habarlaıdy Qamshy.kz aqparat agenttigi otyrar.kz-ke silteme berip.  Kúıeýi eki balanyń anasy, 31 jastaǵy áıelin sýısıd jasady dep málimdegen. Biraq tergeý jumystarynyń nátıjesi kúıeýiniń málimdemesiniń shyndyqqa janaspaıtyndyǵyn dáleldedi.

Óz áıelin uryp, qylqyndyryp óltirgen. Sóıtip ózin ózi óltirgendeı etip kórsetýge tyrysqan. Jubaıyn óltirgen Erkinjan Nartaevqa sot osyndaı aıyp taqty. OQO mamandandyrylǵan aýdanaralyq  sotynda qylmyskerge qatysty  úkim oqyldy.

Dáýren Madalıev, sýdıa: «QR QK niń 99-shy baby, 1-shi bóligimen kináli dep tanylyp, 11 jyl 3 aıǵa bas bostandyǵynan aıyrý jazasyna kesilsin».

Sóıtip óz áıelin óltirgen sottalýshy endi 11 jylyn temir torda ótkizetin bolady. Sondaı — aq, marqumnyń ata — anasyna 3 mln. teńge moraldyq aıyppul tóleıdi.

Qańtar aıynda marqum áıeldiń denesi óz úıinen tabylǵan edi. Týystary ony ekinshi qabattaǵy shóp jınaıtyn saraıdyń ishinde ózin asyp qoıdy degen. Biraq marqum Iýldýzdyń ata-anasy qyzynyń denesinen qatygezdikpen urylǵan soqqy izderin baıqaıdy.

Alǵashynda is áıeldi ózin ózi óltirdi dep tanyp qylmys quramy joq dep jabylǵan edi. Qoǵamdyq uıymdardyń aralasýymen qylmystyq is qaıta qolǵa alyndy.

Lılıa Halıýlına, «Sana sezim» ortalyǵynyń zańgeri: «Bizge marqumnyń týysy habarlasty. Sýretterdi kórsetti. Onda soqqy izderi kórinip turdy. Telefon qońyraýlaryn teksertkende marqum óler aldyn bas prokýratýranyń senim telefonyna habarlasqany málim boldy. İs materıaldarymen tanysyp, qaıta qozǵaýǵa muryndyq boldyq».

Eksgýmasıa jasaǵanda áıeldiń oń jaq qabyrǵasy synǵany belgili bolǵan. Kúıeýi kúdikti retinde ustalyp, tergeý onyń kinásin moıyndaǵan.